Jizzaxda qariyb 14 kg “opiy”ni sotish va tarqatishni rejalashtirgan shaxslar ushlandi
Uch nafar shaxs Tojikistondagi narkokuryerlar qoldirgan narkotik moddalarni olib, ularni sotish orqali daromad orttirishni rejalashtirgan.
Davlat xavfsizlik xizmati Toshkent viloyati bo‘yicha boshqarmasi tomonidan Sirdaryo va Jizzax viloyatlarida giyohvandlik vositalarining noqonuniy aylanishiga qarshi tezkor tadbirlar o‘tkazildi.
Tadbirlar davomida Toshkent shahrida yashovchi, 1985-yilda tug‘ilgan, muqaddam sudlangan shaxsning Sirdaryo tumanidagi vaqtinchalik yashash xonadoni ko‘zdan kechirilgan. Unda 1983-yilda tug‘ilgan Tojikiston fuqarosi hamda Qashqadaryo viloyatida yashovchi, 1962-yilda tug‘ilgan, ilgari giyohvandlik vositalari savdosi bilan bog‘liq jinoyat uchun sudlangan fuqaro ham borligi aniqlangan.
Surishtiruvlar natijasida mazkur uch nafar shaxs qo‘shni Tojikistondagi narkokuryerlar tomonidan Jizzax viloyatining Yangiobod tumani hududidagi yashirin joyga qoldirilgan narkotik moddalarni olib, ularni sotish va tarqatish orqali daromad orttirishni rejalashtirgani ma’lum bo‘lgan.
Tezkor tadbirning davomi sifatida yashirin joy ko‘zdan kechirilib, u yerdan umumiy og‘irligi 13 kilogramm 653 gramm bo‘lgan “opiy” moddasi protsessual tartibda ashyoviy dalil sifatida olib qo‘yilgan.
Mazkur holat yuzasidan shaxslarga nisbatan jinoyat ishi qo‘zg‘atilgan. Hozirda tergov harakatlari olib borilmoqda.
