Nepalda kuchli suv toshqini bo‘ldi: qurbonlar soni 95 nafarga yetdi

Nepalning markaziy hududlarida Bxote Koshi daryosida yuz bergan kuchli toshqin oqibatida kamida 95 kishi halok bo‘ldi, 63 kishi jarohatlandi. Yuzlab odamlar bedarak yo‘qolgan.

 

Toshqin chorshanba kuni ertalab kuchli yog‘ingarchilik ortidan yuzaga kelgan. Tabiiy ofat Nuvakot, Dhadin, Gorxa, Chitvan, Tanaxun va Navalpur tumanlarida katta vayronagarchiliklarni keltirib chiqargan. Rasmiylar 95 nafar marhumning jasadini topgan, biroq ularning shaxsi hozircha rasman aniqlanmagan.

 

Reuters ma’lumotiga ko‘ra, toshqinga Xitoyning Tibet hududida yuz bergan zilzila ortidan kelib chiqqan loy va tog‘ jinslari ko‘chkisi sabab bo‘lgan bo‘lishi mumkin.

 

Toshqin oqibatida 19 ta avtomobillar harakati uchun mo‘ljallangan ko‘prik vayron bo‘lgan, 40 kilometr asfaltlangan yo‘l zarar ko‘rgan. Shuningdek, muhim aloqa tarmoqlari uzilgan.

 

Bedarak yo‘qolganlar orasida 85 nafar xavfsizlik xodimi — 44 nafar Nepal armiyasi, 28 nafar Nepal politsiyasi va 13 nafar Qurolli politsiya kuchlari xodimi bor. Bundan tashqari, mahalliy gidroelektr loyihalarida ishlaydigan 60 nafar xodim, Rasuvagadhi bojxona va immigratsiya idoralari xodimlari hamda 484 nafar sayyohning — 391 nafari xorijiy, 93 nafari mahalliy sayyoh — bedarak yo‘qolgani qayd etilgan.

 

Bosh vazir devoni va Vazirlar kengashi halok bo‘lganlar munosabati bilan chuqur hamdardlik bildirib, barcha xavfsizlik kuchlari va tegishli idoralarga qidiruv-qutqaruv hamda yordam ko‘rsatish ishlarini yuqori shaylik rejimida olib borish bo‘yicha topshiriq bergan.

 

Daryoning quyi oqimidagi qirg‘oqbo‘yi hududlari aholisi xavfdan ogohlantirilib, ehtiyot choralarini ko‘rishga chaqirilgan. Ayrim hududlarda aholini xavfsiz joylarga ko‘chirish ishlari boshlangan. Hozirda 63 nafar jarohatlangan fuqaro shifoxonalarda davolanmoqda.

 

Ayni paytda Janubiy Koreya Tashqi ishlar vazirligi, Milliy yong‘in agentligi va Milliy politsiya agentligi vakillaridan iborat favqulodda qo‘shma tezkor guruhni Nepalga yubormoqda. Bunga Rasuvadagi "Upper Trishuli-1" gidroelektr stansiyasida 8 nafar Janubiy Koreya fuqarosi bedarak yo‘qolgani, yana 10 nafari esa hududda qolib ketgani sabab bo‘lgan.

 

Davlat idoralari va kompaniyalarning tezkor guruhlari joylarda qutqaruv ishlarini muvofiqlashtirishda davom etmoqda. Vaziyat va yetkazilgan zarar ko‘lami ham baholanmoqda.