O‘zbekistonda ortib qolgan 1-sinf o‘quv qurollari bog‘chalarga beriladi
Yaroqlilik muddati tugaydigan ortiqcha o‘quv qurollari davlat bog‘chalarining maktabga tayyorlov guruhlariga ajratiladi.
O‘zbekistonda 1-sinf o‘quvchilari uchun ajratilgan o‘quv qurollarining ortib qolgan qismi keyingi o‘quv yilida ham foydalaniladi. Bu hukumatning 24-avgustdagi qarori bilan belgilandi.
Unga ko‘ra, joriy o‘quv yilida maktablarga qabul qilingan 1-sinf o‘quvchilari soniga mos ravishda tarqatilgan o‘quv qurollari to‘plamidan ortib qolgan qismi keyingi o‘quv yili uchun davlat xaridlarini amalga oshirishda hisobga olinadi.
Shuningdek, keyingi o‘quv yiliga qadar yaroqlilik muddati tugaydigan o‘quv qurollari Maktabgacha va maktab ta’limi vazirligi tomonidan davlat maktabgacha ta’lim tashkilotlarining majburiy maktabga tayyorlov guruhlariga bepul ajratiladi.
Ma’lumot uchun, joriy yilda 795 mingdan ortiq birinchi sinf o‘quvchisiga “Prezident sovg‘asi” topshiriladi. To‘plam 12 turdagi o‘quv qurollaridan, jumladan, maktab sumkasi, daftarlar, ruchka va qalamlar, rangli qog‘oz, plastilin, rasm daftari, akvarel bo‘yoqlari, yelim va qalamdondan iborat.
