Pokiston Eron va AQSh o‘rtasidagi muzokaralarda sezilarli siljish bo‘lganini bildirdi
Tehronda o‘tkazilgan muzokaralarda mojaroning kuchayishiga yo‘l qo‘ymaslik, Hormuz bo‘g‘ozini qayta ochish va urushni yakunlash masalalari muhokama qilindi.
Pokiston Eron va AQSh o‘rtasidagi urushni tugatishga qaratilgan yuqori darajadagi muzokaralarda “sezilarli siljish”ga erishilganini ma’lum qildi.
Muzokaralar Pokiston armiyasi bosh qo‘mondoni, feldmarshal Sayid Asim Munir va mamlakat ichki ishlar vaziri Moxin Naqviyning Tehronga bir kunlik diplomatik tashrifi doirasida o‘tkazildi.
Pokiston harbiylari ma’lumotiga ko‘ra, Asim Munir Eron Prezidenti Mas’ud Pezeshkiyon, tashqi ishlar vaziri Abbos Aroqchi hamda Oliy milliy xavfsizlik kengashi kotibi Moxsen Rizoiy bilan uchrashgan.
Uchrashuvlarda mojaroning yanada kuchayishiga yo‘l qo‘ymaslik, Hormuz bo‘g‘ozini qayta ochish va urushni imkon qadar tezroq yakunlash masalalari muhokama qilingan.
Moxin Naqviy muzokaralar yakunida tomonlar Pokiston vositachiligida ishlab chiqilgan va mojaroni tugatishga qaratilgan “Islomobod memorandumi”ni qayta tiklash uchun zarur choralarni ko‘rib chiqqanini bildirgan. Uning ta’kidlashicha, Eron tomoni o‘z xavotirlarini ochiq bayon qilgan va muzokaralar barcha masalalar bo‘yicha konstruktiv ruhda kechgan.
Eron Prezidenti Mas’ud Pezeshkiyon esa AQSh Tehron bilan munosabatlarda o‘z yondashuvini o‘zgartirishi kerakligini ta’kidlagan. Uning fikricha, Vashington bosim o‘tkazish va shartlarni majburan qabul qildirish siyosatidan voz kechishi lozim.
Ma’lumotlarga ko‘ra, “Islomobod memorandumi” 17-iyun kuni Vashington va Tehron tomonidan imzolangan, biroq Fors ko‘rfazidagi kemalarni qo‘lga olish holatlari va yangi hujumlardan so‘ng kelishuv amalda to‘xtab qolgan.
Pokistonning yangi diplomatik tashabbusi AQSh Eronni qo‘llab-quvvatlayotgan davlatlarga nisbatan keskin iqtisodiy choralar ko‘rishi mumkinligi haqida ogohlantirgan, Tehron esa bunga javoban Fors ko‘rfazidan neft eksportini to‘liq to‘xtatish bilan tahdid qilayotgan bir paytda amalga oshirilmoqda.
