Pokistonda tug‘ruqxonadagi yong‘inda 14 chaqaloq halok bo‘ldi
Dastlabki ma’lumotlarga ko‘ra, yong‘inga bo‘lim ichidagi konditsioner kompressorining portlashi sabab bo‘lgan.
Pokiston poytaxti Islomoboddagi Pokiston Tibbiyot fanlari instituti (PIMS) tug‘ruqxonasining yangi tug‘ilgan chaqaloqlar bo‘limida yong‘in sodir bo‘ldi. Dastlabki ma’lumotlarga ko‘ra, hodisa oqibatida kamida 14 chaqaloq halok bo‘lgan. Bu haqda Sinxua axborot agentligi xabar berdi.
Yong‘in 26-avgust kuni mahalliy vaqt bilan soat 6:40–6:45 atrofida shifoxonaning uchinchi qavatidagi yangi tug‘ilgan chaqaloqlar bo‘limida yuz bergan. Hodisa joyiga o‘t o‘chirish xizmatlari, tez tibbiy yordam brigadalari va huquqni muhofaza qiluvchi organlar yetib kelgan.
Qutqaruv ishlari davomida palatadagi bir nechta chaqaloqlar boshqa bo‘limlarga olib chiqilgan. Politsiya manbalariga ko‘ra, to‘qqiz chaqaloq voqea joyida, qolganlari esa shifoxonaning bolalar bo‘limiga ko‘chirilganidan keyin olgan jarohatlari oqibatida vafot etgan.
Ayrim mahalliy OAVlar yong‘inga konditsioner kompressorining portlashi sabab bo‘lganini bildirgan. Biroq hodisaning aniq sababi hozircha rasman tasdiqlanmagan.
Yong‘in o‘chirilgan, ayni paytda voqea joyidagi inshootlarni demontaj qilish va xavfsizlik choralarini ko‘rish ishlari olib borilmoqda. Yong‘in sabablarini aniqlash uchun tergov komissiyasi tuzilgan.
Hodisa oqibatida halok bo‘lganlar soni bo‘yicha turli ma’lumotlar tarqalmoqda. Rasmiy tekshiruv yakunlari va yakuniy ma’lumotlar kutilmoqda.
