Qatarda o‘zbekistonliklar uchun 5 500 dollargacha maoshli ish o‘rinlari taklif etildi
Ish beruvchi aviachipta, ishchi vizasi, aeroport transferi va tibbiy sug‘urta xarajatlarini qoplaydi.
O‘zbekiston Migratsiya agentligi Qatarda faoliyat yurituvchi Ulta Beauty do‘konlaridagi turli lavozimlar uchun o‘zbekistonlik nomzodlarni ishga taklif qilmoqda.
Bo‘sh ish o‘rinlari orasida kosmetika bo‘yicha maslahatchi, vizajist, mijozlarga xizmat ko‘rsatish menejeri, bo‘lim menejeri, do‘kon menejeri o‘rinbosari, teri parvarishi va manikyur-pedikyur mutaxassislari, shuningdek, do‘kon bosh menejeri kabi lavozimlar mavjud.
Lavozimlarga qarab oylik maosh 1 450 dollardan 5 500 dollargacha etib belgilangan. Eng yuqori maosh — do‘kon bosh menejeri lavozimi uchun 5 500 dollar.
Nomzodlardan kamida o‘rta ma’lumot, ingliz tilida erkin muloqot qilish ko‘nikmasi, 20 yoshdan katta bo‘lish hamda tegishli sohada kamida 2 yillik ish tajribasi talab etiladi. Vakansiyalarda erkaklar va ayollar ishtirok etishi mumkin.
Ish beruvchi O‘zbekiston–Qatar aviachiptasi, ishchi vizasi, aeroport transferi, vatanga borib-kelish aviachiptasi va tibbiy sug‘urta xarajatlarini qoplab beradi. Turar joy, oziq-ovqat hamda ishga borib-kelish xarajatlari esa xodim zimmasida.
Vakansiyalarga arizalar 29-avgustgacha qabul qilinadi.
