Qaysi OTM bitiruvchilari eng ko‘p daromad olmoqda?

 

Ta’lim sifatini ta’minlash milliy agentligi Bitiruvchilar sifati indeksi (BSI) natijalari asosida bitiruvchilari eng yuqori daromad olayotgan oliy ta’lim tashkilotlari reytingini e’lon qildi. Bu haqda agentlik tomonidan tashkil etilgan matbuot anjumanida ishtirok etgan Zamon.uz muxbiri xabar berdi.

 

Tadqiqot doirasida 170 ta oliy ta’lim tashkilotini tamomlagan 249 ming 432 nafar bitiruvchining mehnat bozoridagi natijalari o‘rganilgan.

 

2025-yil iyulidan 2026-yil iyunigacha bo‘lgan davrda O‘zbekistonda OTM bitiruvchilarining o‘rtacha rasmiy oylik daromadi 4,9 mln so‘mni tashkil etgan.

 

Ta’lim yo‘nalishlari bo‘yicha eng yuqori o‘rtacha daromad ijodiy va sport yo‘nalishlari bitiruvchilarida — 6,33 mln so‘m qayd etilgan. Keyingi o‘rinlarda amaliy fanlar — 5,5 mln so‘m, ijtimoiy-gumanitar fanlar — 4,61 mln so‘m hamda tibbiyot fanlari — 4,43 mln so‘mni tashkil qilgan.

 

Bitiruvchilari eng yuqori o‘rtacha daromadga ega bo‘lgan OTMlar orasida Toshkentdagi S. A. Gerasimov nomidagi Butunrossiya davlat kinematografiya instituti (VGIK) filiali yetakchi bo‘lgan. Ushbu OTM bitiruvchilarining o‘rtacha daromadi 23,4 mln so‘mni tashkil etgan.

 

Keyingi o‘rinlarni Toshkentdagi Inha universiteti — 12,6 mln so‘m, Toshkentdagi Vestminster xalqaro universiteti — 12,5 mln so‘m, Jahon iqtisodiyoti va diplomatiya universiteti — 10,6 mln so‘m hamda Toshkent davlat iqtisodiyot universiteti — 10,3 mln so‘m bilan egallagan.

 

Shuningdek, reytingda Toshkent axborot texnologiyalari universiteti — 9,4 mln so‘m, Toshkentdagi Singapur menejmentni rivojlantirish instituti — 9,3 mln so‘m, Plekhanov nomidagi Rossiya iqtisodiyot universitetining Toshkent filiali — 9 mln so‘m, Toshkent davlat yuridik universiteti — 8,4 mln so‘m va Navoiy davlat konchilik va texnologiyalar universiteti — 8,1 mln so‘m o‘rtacha daromad ko‘rsatkichi bilan qayd etilgan.

 

Agentlik ma’lumotlariga ko‘ra, reytingni shakllantirishda faqat rasmiy qayd etilgan daromadlar hisobga olingan. Bitiruvchilarning daromadi ular yashaydigan hududdagi o‘rtacha ish haqi bilan taqqoslangan.

 

Agentlik direktori Baxtiyor Yo‘ldoshevning ta’kidlashicha, Bitiruvchilar sifati indeksini joriy etishdan asosiy maqsad abituriyentlarga OTM tanlashda ishonchli va xolis mezon taqdim etishdir.