852 nafar shaxs afv etildi
Ularning 604 nafari jazodan to‘liq ozod qilinadi.
O‘zbekiston Prezidentining Mustaqillikning 35 yilligi arafasida jazo muddatini o‘tayotgan, qilmishidan chin ko‘ngildan pushaymon bo‘lgan va tuzalish yo‘liga qat’iy o‘tgan shaxslarni afv etish to‘g‘risidagi farmoni imzolandi. Bu haqda “O‘zbekiston 24” telekanalida ma'lum qilindi.
Farmonga muvofiq, jami 852 nafar shaxs afv etildi.
Shundan:
-
604 nafari jazodan to‘liq ozod qilinadi;
-
115 nafari muddatidan ilgari shartli ravishda ozod qilinadi;
-
52 nafarining jazosi yengilroq jazo bilan almashtiriladi;
-
81 nafar mahkumning jazo muddati qisqartiriladi.
Afv etilganlar orasida 7 nafar xorijiy fuqaro hamda taqiqlangan tashkilotlar faoliyatida qatnashgan 63 nafar shaxs bor.
Shuningdek, afv etilganlarning 375 nafari yoshlar, 49 nafari ayollar va 37 nafari 60 yoshdan oshgan erkaklarni tashkil etadi.
