Nepalda suv toshqinlari qurbonlari soni 157 kishiga yetdi

 

Nepal shimolida yuz bergan kuchli suv toshqinlari oqibatida halok bo‘lganlar soni 157 nafarga yetdi. Bu haqda Ratopati nashri mahalliy politsiya ma’lumotlariga tayanib xabar berdi.

 

Eng ko‘p qurbon Chitvan tumanida qayd etilgan bo‘lib, u yerda 64 kishining jasadi topilgan. Shuningdek, Dhadingda 27, Sharqiy Navalparasi hududida 22, Gorkxada 19, Nuvakotda 13, Tanaxunda 9 va Rasuva tumanida 3 kishi halok bo‘lgan.

 

Hozirda 41 nafar jarohatlangan kishi tibbiyot muassasalarida davolanmoqda.

 

Qidiruv-qutqaruv ishlariga 3,3 mingdan ortiq xodim, jumladan, Nepal armiyasi va boshqa tegishli idoralar vakillari jalb etilgan. Operatsiyada 15 ta vertolyot ham ishtirok etmoqda.

 

Qutqaruv ishlari noqulay ob-havo sharoiti sabab qiyinlashmoqda. Rasmiylar tabiiy ofat hududida qolib ketgan fuqarolarga qutqaruvchilar ularni havodan aniqlashi uchun olov yoqishni tavsiya qilgan.

 

Dastlabki ma’lumotlarga ko‘ra, suv toshqinlari qor va tosh ko‘chkilari ortidan yuzaga kelgan. Shuningdek, Nepal tashqi ishlar vaziri Shishir Xanal tabiiy ofatga zilzila sabab bo‘lgan bo‘lishi mumkinligini bildirgan. Taxminlarga ko‘ra, zilzila oqibatida yuzaga kelgan yirik ko‘chki Bhote Koshi daryosini to‘sib, suv sathining keskin ko‘tarilishiga olib kelgan.

 

Suv toshqinlari oqibatida mingga yaqin odam, jumladan, qariyb 400 nafar xorijiy sayyoh bedarak yo‘qolgan bo‘lishi mumkinligi haqida ma’lumotlar bor.

 

Shuningdek, Rossiyaning Katmandudagi elchixonasi suv toshqini hududida bo‘lgan rossiyalik fuqarolar haqida ham ma’lumot bergan. Bir guruh fuqarolar bilan aloqa uzilgan bo‘lsa, Rasuva tumanida bo‘lgan yana sakkiz nafar rossiyalik xavfsiz hududga evakuatsiya qilingan.