Nepaldagi suv toshqinlarida halok bo‘lganlar orasida o‘zbekistonliklar yo‘q
O‘zbekistonning Dehlidagi elchixonasi tegishli idoralar bilan doimiy aloqada bo‘lib, vaziyat rivojini muntazam kuzatib borayotganini ma’lum qildi.
Nepal va Tibetdagi suv toshqinlari oqibatida halok bo‘lganlar orasida O‘zbekiston fuqarolari yo‘q. Bu haqda “Dunyo” axborot agentligi xabar berdi.
Qayd etilishicha, O‘zbekistonning Dehlidagi (ayni paytda Nepalda ham faoliyat yuritadi) elchixonasi hozirgi vaqtda falokat oqibatida halok bo‘lganlar va jabrlanganlar orasida o‘zbekistonliklar borligi to‘g‘risida ma’lumot kelib tushmaganini bildirgan. Diplomatik vakolatxona tegishli idoralar bilan doimiy aloqada bo‘lib, vaziyat rivojini muntazam kuzatib bormoqda.
Reuters’ga ko‘ra, tabiiy ofat oqibatida Nepalda kamida 165 kishi halok bo‘lgan, 826 kishi bedarak yo‘qolgan. Bedarak yo‘qolganlar orasida 500 ga yaqin xorijlik bor.
Tibetning Jiro‘ng hududida esa 558 kishi, jumladan, 260 nafar xorijlik bedarak yo‘qolgan. Xitoy rasmiylariga ko‘ra, hududda uch kishi halok bo‘lgan. Hozirda Nepal va Tibetda qidiruv-qutqaruv ishlari davom etmoqda.
