Qozog‘istonda 16 yoshgacha bo‘lgan bolalar uchun ijtimoiy tarmoqlarga cheklov kiritilishi mumkin
Toqayev 16 yoshgacha bo‘lgan bolalarning ijtimoiy tarmoqlarda ro‘yxatdan o‘tishini taqiqlash masalasini ko‘rib chiqishni taklif qildi.
Qozog‘iston Prezidenti Qosim-Jomart Toqayev 16 yoshgacha bo‘lgan bolalarning ijtimoiy tarmoqlarda ro‘yxatdan o‘tishini taqiqlash masalasini ko‘rib chiqishni taklif qildi. Bu haqda Tengrinews.kz Akorda matbuot xizmatiga tayanib xabar berdi.
Davlat rahbari bu taklifni Ostonada o‘tkazilgan o‘qituvchilarning avgust konferensiyasida ilgari surgan.
Toqayevning ta’kidlashicha, bugungi kunda ijtimoiy tarmoqlar, raqamli platformalar, sun’iy intellekt va agressiv marketing bolalarning dunyoqarashiga oila va maktab bilan bir qatorda sezilarli ta’sir ko‘rsatmoqda. Shu sababli yosh avlodning psixologik farovonligi, hissiy barqarorligi va axloqiy tarbiyasini ta’minlash muhim vazifalardan biriga aylangan.
Prezident 2018-yilda qabul qilingan bolalarni sog‘lig‘i va rivojlanishiga zararli axborotdan himoya qilishga qaratilgan qonunchilikni bugungi sharoitdan kelib chiqib qayta ko‘rib chiqish zarurligini ta’kidlagan.
Uning qayd etishicha, hukumat 16 yoshgacha bo‘lgan foydalanuvchilarning ijtimoiy tarmoqlarda ro‘yxatdan o‘tishini taqiqlashni nazarda tutuvchi qonun loyihasini ishlab chiqqan va hujjat iyun oyida Parlamentga taqdim etilgan.
Toqayev deputatlarga mazkur masalani Parlamentning yangi sessiyasi doirasida ko‘rib chiqishni taklif qilgan.
Prezident bunday cheklovlarni joriy etish bo‘yicha qator rivojlangan davlatlarda ham tegishli choralar ko‘rilayotganini qayd etgan.
