Samarqandda enaga qarovida bo‘lgan 3 yoshli bola elektr plitaga o‘tqazilgani aytilmoqda
Guvohlar bolaga nisbatan shafqatsiz munosabatda bo‘lingani, jumladan, qizigan elektr plitaga o‘tqazilgani, qo‘llari sim bilan bog‘langani va bir necha kun ovqatlantirilmaganini aytmoqda.
Samarqand viloyati Kattaqo‘rg‘on tumanida enaga qarovida bo‘lgan 3 yoshli bola zo‘ravonlikka uchragani aytilmoqda. Voqeadan xabar topgan qo‘shnilar huquqni muhofaza qiluvchi organlarga murojaat qilgan. Shundan so‘ng bola shifoxonaga olib borilgan.
Ma’lum bo‘lishicha, bolaning onasi qariyb ikki oy davomida farzandini enaga qaroviga qoldirib, ishlagan. Oila asli Narpay tumanidan bo'lgan bolaning otasi xorijda mehnat qilayotgani, onasi esa oilaviy sharoiti sabab Kattaqo‘rg‘onda ishlagan.
Bolaning yaqinlari va guvohlarning so‘zlariga ko‘ra, enaga unga nisbatan shafqatsiz munosabatda bo‘lgan. Jumladan, bolaning qo‘llari sim bilan bog‘langani va qizigan elektr plitaga o‘tqazilgani iddao qilinmoqda.
Shifokorlar bolaning tanasida kuyish, ko‘karish va boshqa jarohatlar aniqlanganini bildirgan. Shuningdek, u bir necha kun davomida ovqatlantirilmagani sabab ozib ketgani va gemoglobin darajasi pasaygani aytilmoqda.
Shifoxona ma’lumotiga ko‘ra, bolaning dumba-son sohasidagi og‘ir kuyishlari sabab jarrohlik amaliyoti o‘tkazilib, teri ko‘chirish muolajasi bajarilgan. Bo‘yin va ko‘z osti sohalarida ham ko‘karishlar aniqlangan. Hozirda bolaning ahvoli qoniqarli ekani ma’lum qilingan.
Guvohlardan biri ushbu enaga avval ham boshqa bolalarga qaragani va uning telefonida bolalarga nisbatan zo‘ravonlik aks etgan videolar bo‘lishi mumkinligini aytgan. Shuningdek, boshqa bolalarga ham shafqatsiz munosabatda bo‘lingani haqidagi ma’lumotlar bildirilgan.
Bolaning yaqinlari voqeaga huquqiy baho berilishini hamda aybdor shaxslar aniqlanib, qonuniy chora ko‘rilishini kutmoqda.
Bolalar ombudsmani mazkur holatni o‘z nazoratiga olgan. Ombudsmanning Samarqand viloyatidagi hududiy vakili vaziyatni o‘rganishni boshlagan.
Hozirda holat yuzasidan Ichki ishlar organlari tomonidan tegishli ishlar olib borilmoqda. Voqeaning barcha tafsilotlari, bolaning jarohatlanishiga sabab bo‘lgan holatlar va mas’ul shaxslarning harakatlariga tergov natijalariga ko‘ra huquqiy baho beriladi.
