Talabalar kontraktni 4 qismga bo‘lib to‘lashi mumkin: muddatlar ma’lum qilindi

 

To‘lov-kontrakt asosida tahsil olayotgan talabalarga kontrakt summasini o‘quv yili davomida 4 qismga bo‘lib to‘lash imkoniyati beriladi.

 

Tartibga ko‘ra, kontrakt to‘lovlari quyidagi muddatlarda amalga oshiriladi:

• 25 foiz — 1-kursga tavsiya etilgan talabalar uchun 15-sentabrgacha, 2-kurs va undan yuqori bosqich talabalari uchun 1-oktabrgacha;

• 50 foiz — 1-yanvargacha;

• 75 foiz — 1-martgacha;

• 100 foiz — 1-maygacha.

 

Shu bilan birga, belgilangan muddatlar uzaytirilishi mumkin. 1-kurs talabalari uchun dastlabki to‘lov muddatini uzaytirish vakolati Davlat qabul komissiyasiga, boshqa kurslar bo‘yicha esa tegishli vakolat OTM rektorlariga berilgan.

 

2025/2026-o‘quv yilida 1-kurs talabalari uchun kontraktning dastlabki 25 foizini to‘lash muddati 30-oktabrgacha uzaytirilgan edi.

 

Moliyaviy mustaqillik berilgan davlat OTMlari hamda nodavlat oliy ta’lim tashkilotlari kontrakt miqdori va uni to‘lash muddatlarini mustaqil belgilaydi.

 

Joriy yilda OTMga qabul qilingan talabalar kontrakt to‘lovlari bo‘yicha arizani kontrakt.edu.uz platformasi orqali yuborishi mumkin.

 

Shuningdek, kontraktni bo‘lib to‘lash imkoniyati super-kontrakt asosida tahsil olishni rejalashtirayotgan abituriyentlarga ham tatbiq etiladi. Biroq bunda dastlab kontrakt summasining 50 foizini to‘lash talab etiladi. Qolgan qismi esa umumiy tartibda bo‘lib to‘lanadi.