Bayram kunlari qo‘shimcha avtobus, elektropoyezd va aviareyslar tashkil etiladi

 

O‘zbekiston mustaqilligining 35 yilligi munosabati bilan bayram kunlarida aholining mamlakat bo‘ylab sayohat qilishi uchun qo‘shimcha transport imkoniyatlari yaratiladi. Bu haqda Turizm qo‘mitasi ma’lum qildi.

 

Bayram kunlarida ichki turizmni rag‘batlantirish, aholining turistik hududlarga borib-kelishi uchun qulay sharoit yaratish maqsadida temir yo‘l, avtomobil va havo transporti yo‘nalishlarida qo‘shimcha qatnovlar tashkil etiladi.

 

Temir yo‘l transportida “Toshkent–Xiva–Toshkent”, “Toshkent–Qo‘ng‘irot–Toshkent”, “Toshkent–Shovot–Toshkent”, “Toshkent–Termiz–Toshkent” hamda “Toshkent–Sariosiyo–Toshkent” yo‘nalishlaridagi poyezdlarga 4 tagacha qo‘shimcha vagon ulanadi.

 

Shuningdek, “Toshkent–Samarqand–Toshkent”, “Toshkent–Buxoro–Toshkent” va “Toshkent–Urganch–Toshkent” yo‘nalishlarida yuqori tezlikda harakatlanuvchi elektropoyezdlarning qo‘shimcha qatnovlari yo‘lga qo‘yiladi. Ular bayramdan ikki kun oldin ishga tushirilib, bayramdan keyingi ikki kun davomida ham qatnovlar saqlab qolinadi.

 

Avtomobil transportida esa viloyatlararo barcha yo‘nalishlarda qo‘shimcha avtobus qatnovlari tashkil etiladi. Jumladan, Toshkent–Janubiy temir yo‘l vokzali hududida viloyatlararo avtobuslar uchun zaxira to‘xtash joyi ajratiladi. Bayramdan kamida 3 kun oldin “Toshkent–Samarqand–Buxoro–Urganch–Nukus” yo‘nalishlaridagi avtobuslar ushbu hududga joylashtiriladi.

 

Havo transportida ham turistik yo‘nalishlarga qo‘shimcha aviareyslar amalga oshiriladi. Bayramdan kamida ikki kun oldin “Toshkent–Urganch”, “Toshkent–Nukus”, “Toshkent–Buxoro” va “Toshkent–Termiz” yo‘nalishlarida qo‘shimcha reyslar yo‘lga qo‘yiladi.

 

Mazkur choralar bayram kunlarida aholining O‘zbekiston bo‘ylab sayohat qilish imkoniyatlarini kengaytirish, ichki turizmni rivojlantirish hamda tarixiy, madaniy va tabiiy turistik maskanlarga tashriflar uchun qulay sharoit yaratishga qaratilgan.