Bayram kunlari shifoxonalar va “103” xizmati uzluksiz ishlaydi — SSV
Shifoxonalar, ixtisoslashtirilgan tibbiyot markazlari, tug‘ruq va bolalar muassasalari navbatchilik asosida faoliyat yuritadi.
Mustaqillik bayrami munosabati bilan 29-avgust – 1-sentabr kunlari mamlakatimizda tibbiy xizmatlar uzluksiz tashkil etiladi.
Sog‘liqni saqlash vazirligida bayram va dam olish kunlarida tibbiyot muassasalari faoliyatini muvofiqlashtirish maqsadida alohida shtab tashkil etildi.
Mazkur kunlarda tuman va shahar, viloyat hamda respublika miqyosidagi shifoxonalar, ixtisoslashtirilgan tibbiyot markazlari, tibbiyot oliy ta’lim muassasalari klinikalari hamda 39 ta tumanlararo qo‘shma shikastlanish va o‘tkir qon-tomir kasalliklari markazlarida navbatchilik asosida tibbiy xizmat ko‘rsatiladi.
Shuningdek, Respublika shoshilinch tibbiy yordam ilmiy markazi va uning 13 ta hududiy filiali, shuningdek, qariyb 200 ta shoshilinch tibbiy yordam bo‘limida navbatchi shifokor va hamshiralar 24 soat davomida faoliyat yuritadi.
29-avgust – 1-sentabr sanalarida “103” tez tibbiy yordam xizmati ham bayram kunlarida odatiy tartibda ishlaydi. Tizimning 14 ta hududiy filiali, 189 ta stansiyasi, 40 ta podstansiyasi va 1 492 ta tayanch punktida 2 900 dan ziyod tibbiy yordam brigadasi chaqiruvlarga doimiy shay holatda bo‘ladi.
Bundan tashqari, mamlakatdagi barcha tug‘ruq va bolalar davolash muassasalari ham bayram kunlari uzluksiz faoliyat yuritadi.
