“Bir dona ham elektron doska sotib olinmagan” — parlamentda maktablarni jihozlash jarayoni tanqid qilindi
Maktabgacha va maktab taʼlimi vazirligi xaridlar tender asosida amalga oshirilishini va jihozlar oktyabr oxirigacha yetkazilishini bildirdi.
O‘zbekistonda 2026 yil yakuniga qadar umumtaʼlim maktablarida yangi kompyuter sinflarini tashkil etish hamda elektron doskalar xarid qilish rejalashtirilgan. Mazkur maqsadlar uchun davlat byudjetidan jami 350 mlrd so‘m mablag‘ ajratilgan.
25 avgust kuni parlament yig‘ilishida ushbu ishlarning bajarilish jarayoni muhokama qilindi. Deputat Zuhriddin Mavlonov maktablar uchun xarid qilinishi belgilangan jihozlar bo‘yicha ishlar kechikayotganini tanqid qildi.
Maʼlum qilinishicha, dastlab 1 mingta kompyuter sinfi tashkil etilishi rejalashtirilgan bo‘lsa, dastlabki ekspertiza xulosalari asosida bu ko‘rsatkich 1 350 ta kompyuter sinfi etib belgilangan.
Maktabgacha va maktab taʼlimi vaziri Eʼzoza Karimovaning bildirishicha, ayni paytda tegishli davlat xaridlari jarayoni davom etmoqda.
Shuningdek, 6 300 ta elektron doska xarid qilish bo‘yicha tender 12 iyul kuni eʼlon qilingan. G‘olib aniqlanmagani sababli tender 10 avgust kuni qayta eʼlon qilingan. G‘olibni aniqlash jarayoni 26 avgustga belgilangan.
Vazirning taʼkidlashicha, barcha xaridlar amalga oshirilgach, belgilangan jihozlar oktyabr oyi yakuniga qadar maktablarga to‘liq yetkazib beriladi.
Deputat esa mablag‘, masʼullar va bajarish muddati oldindan belgilanganiga qaramay, hozirgacha amaliy xaridlar amalga oshirilmaganiga eʼtibor qaratdi.
