Hindiston O‘zbekistonga 500 ming dollarlik tibbiy uskunalar berdi
Harbiy xavfsizlik va mudofaa universiteti poliklinikasi Hindistonning beg‘araz yordami doirasida 70 ta zamonaviy tibbiy uskuna, jumladan, reanimobil va diagnostika qurilmalari bilan jihozlandi.
O‘zbekiston mustaqilligining 35 yilligi arafasida Harbiy xavfsizlik va mudofaa universiteti poliklinikasi Hindiston hukumati tomonidan beg‘araz yordam sifatida taqdim etilgan zamonaviy tibbiy texnika va uskunalar bilan jihozlanib, foydalanishga topshirildi. Bu haqda Dunyo axborot agentligi xabar berdi.
Tantanali ochilish marosimida Harbiy xavfsizlik va mudofaa universiteti boshlig‘ining birinchi o‘rinbosari, general-mayor Farhodjon Shermatov, Hindistonning O‘zbekistondagi elchisi Smita Pant, harbiy xizmatchilar va faxriylar ishtirok etdi.
Tadbir doirasida Hindiston hukumati tomonidan O‘zbekiston Mudofaa vazirligining harbiy gospitallari uchun taqdim etilgan zamonaviy diagnostika va davolash uskunalari, ixtisoslashtirilgan reanimatsiya mashinasi hamda to‘rtta travma uskunalari to‘plami rasman topshirildi.
Poliklinikani modernizatsiya qilish doirasida umumiy qiymati 500 ming dollar bo‘lgan 70 ta zamonaviy tibbiy uskunaning 49 tasi ushbu muassasaga yetkazib berildi. Ular orasida raqamli rentgenografiya qurilmasi, Xolter monitoringi, sikloergometr, ultratovush apparati, zamonaviy stomatologik va fizioterapiya uskunalari mavjud.
Yangi tibbiy imkoniyatlar harbiy xizmatchilar, kursantlar va ularning oila a’zolariga ko‘rsatiladigan tibbiy xizmat sifatini oshirish, kasalliklarni erta aniqlash va samarali davolashga xizmat qiladi. Reanimobilning foydalanishga topshirilishi esa shoshilinch tibbiy yordam ko‘rsatish imkoniyatlarini yanada kengaytiradi.
O‘zbekiston va Hindiston o‘rtasidagi harbiy ta’lim va tibbiyot sohalaridagi hamkorlik izchil rivojlanib bormoqda. Avvalroq Hindiston ko‘magida universitetda axborot texnologiyalari va kiberxavfsizlik laboratoriya majmuasi tashkil etilgan. Shuningdek, hindistonlik mutaxassislar kursantlar va ofitserlarni tayyorlash jarayonida faol ishtirok etmoqda.
Marosimda Hindiston hukumatiga harbiy-tibbiy hamkorlikni rivojlantirishga qo‘shayotgan hissasi uchun minnatdorlik bildirildi. Mudofaa sohasidagi hamkorlikni mustahkamlashda faol ishtirok etgan hindistonlik mutaxassislar Mudofaa vazirligining “Jangovar hamdo‘stlikni mustahkamlashdagi xizmatlari uchun” ko‘krak nishoni va esdalik sovg‘alari bilan taqdirlandi.
Tadbir yakunida mehmonlar poliklinikada yaratilgan zamonaviy sharoitlar va yangi tibbiy imkoniyatlar bilan tanishdi.
