Ispaniyada 3 ming yillik xazina to'rt daqiqada o'g'irlab ketildi
O‘g‘irlangan oltin buyumlarning qiymati kamida 1,7 million yevroga baholanmoqda.
Ispaniyaning Alikante provinsiyasidagi Villena arxeologiya muzeyidan bronza davriga oid “Villena xazinasi”ning katta qismi o‘g‘irlab ketildi. Dastlabki baholarga ko‘ra, o‘g‘irlangan oltin buyumlarning qiymati kamida 1,7 million yevroni tashkil etadi. Bu haqda El Pais xabar berdi.
Voqea payshanba kuni erta tongda sodir bo‘lgan. O‘g‘rilar jinoyatni to‘rt daqiqadan kamroq vaqt ichida amalga oshirgan.
“Villena xazinasi” miloddan avvalgi taxminan 1000-yillarga oid bo‘lib, 50 dan ortiq zargarlik buyumlari va oltin, kumush, temir hamda kehribardan tayyorlangan boshqa qadimiy artefaktlarni o‘z ichiga oladi. Xazina 1960-yillarda Villena shahri hududidan topilgan va shundan buyon mahalliy arxeologiya muzeyida saqlanib kelgan.
Mazkur kolleksiya Yevropadagi bronza davriga oid eng yirik oltin buyumlar to‘plamlaridan biri hisoblanadi.
Villena meri Fulgensio Serdan hodisadan qattiq iztirobda ekanini bildirib, xazina shahar aholisi uchun katta tarixiy va madaniy ahamiyatga ega ekanini ta’kidladi.
Uning so‘zlariga ko‘ra, jinoyatchilar kolleksiyadagi deyarli barcha oltin buyumlarni olib ketgan. Biroq kumush idishlar, bilaguzuk va ayrim boshqa artefaktlar joyida qolgan. Keyinchalik muzeydan yana uchta oltin va kumush buyum ham yo‘qolgani aniqlangan.
Meri o‘g‘irlangan buyumlarning qiymati kamida 1,7 million yevro deb baholanayotganini, bu faqat metallarning qiymati ekanini, artefaktlarning tarixiy va madaniy qiymati bundan ancha yuqori ekanini qayd etdi.
Dastlabki ma’lumotlarga ko‘ra, jinoyatchilar o‘g‘irlikdan avval chalg‘ituvchi taktikadan foydalangan. Soat 05:16 da shahar chetidagi sport markazida signal ishga tushgan va huquq-tartibot xodimlari voqea joyiga yo‘l olgan. Oradan to‘rt daqiqa o‘tib, 05:20 da muzey signalizatsiyasi ishga tushgan. Politsiya soat 05:24 da yetib kelganida, jinoyatchilar allaqachon binoni tark etgan bo‘lgan.
Videokuzatuv kameralarida muzeyga ikki transport vositasida yaqinlashgan bir necha kishi qayd etilgan.
Hozirda Ispaniya huquq-tartibot idoralari tomonidan o‘g‘irlik yuzasidan tergov olib borilmoqda.
