Mustaqillikning 35 yilligiga bag‘ishlangan oltin va kumush tangalar sotuvga chiqarildi
Markaziy bank tomonidan chiqarilgan kolleksiya uchta tangadan iborat bo‘lib, ularning har biri 31,1 gramm og‘irlikda va 100 ming so‘m nominal qiymatga ega.
O‘zbekiston Markaziy banki mamlakat mustaqilligining 35 yilligiga bag‘ishlangan esdalik oltin va kumush tangalar kolleksiyasini sotuvga chiqardi. Bu haqda Markaziy bank matbuot xizmati xabar berdi.
Uchta tangadan iborat kolleksiya O‘zbekistonning milliy davlatchiligi, tarixiy merosi, milliy qadriyatlari va zamonaviy taraqqiyot g‘oyalarini yagona badiiy konsepsiyada aks ettirgan.
Kolleksiyaning birinchi tangasida Mustaqillik monumenti, ikkinchisida Toshkent shahridagi Islom sivilizatsiyasi markazi, uchinchi tangasida esa mustaqillikning 35 yilligini ifodalovchi “35” raqami tasvirlangan.
Tangalar 999,9 asillikdagi oltin va kumushdan tayyorlangan bo‘lib, har birining og‘irligi 31,1 gramm, nominal qiymati 100 ming so‘mni tashkil etadi. Ular uch donalik kolleksiya shaklida yoki alohida holda sotiladi.
Oltin tangalarning dastlabki tiraji 450 dona, kumush tangalarniki esa 800 dona etib belgilangan. Zaruratga ko‘ra, tangalar tiraji oshirilishi mumkin.
Esdalik tangalari 27-avgustdan boshlab tijorat banklari filiallarida sotuvga chiqarilgan. Ularning sotuv narxlari hamda mavjudligi haqidagi ma’lumotlar Markaziy bankning rasmiy veb-saytida muntazam e’lon qilib boriladi.
