Nepal va Xitoy chegarasidagi toshqinlarda halok bo‘lganlar soni 600 nafarga yaqinlashdi
Minglab odamlar bedarak yo‘qolgan. Qutqaruv ishlari hududdagi xavf kamayganidan so‘ng qayta boshlandi.
Nepal va Xitoy chegarasida qisqa vaqtga to‘xtatilgan qutqaruv operatsiyalari qayta boshlandi. Hududda ko‘lning toshib ketishi bilan bog‘liq xavf kamaydi.
Reuters xabariga ko‘ra, muzlik qulashi natijasida yuzaga kelgan kuchli oqim Nepalda 579 kishining, Xitoyning Tibet hududida esa 5 kishining hayotiga zomin bo‘lgan. Nepalda 1 924 kishi, Tibetning Jiro‘ng okrugida esa 558 kishi bedarak yo‘qolgan. Ularning 260 nafari xorij fuqarolari.
Qizil Xoch tabiiy ofatdan 90 mingdan ortiq kishi zarar ko‘rganini bildirdi.
Toshqin oqibatida hosil bo‘lgan ko‘l Lende Hola va Trishuli daryolariga tosha boshlagach, Nepalda qutqaruv ishlari qariyb uch soatga to‘xtatilgan. Xavf kamaygach, operatsiyalar qayta tiklangan. Biroq rasmiylar hududdagi ikkita to‘siq ko‘li to‘liq qurimaguncha toshqin xavfi saqlanib qolishidan ogohlantirmoqda.
Shuningdek, Hindistonning Uttar-Pradesh shtatida Nepal tomondan oqib keladigan daryolardan 10 kishining jasadi topilgan.
Bir qator davlatlar Nepalga qidiruv-qutqaruv yordamini taklif qilgan bo‘lsa-da, mamlakat hukumati hozircha xorijiy guruhlar yordamiga ehtiyoj yo‘qligini ma’lum qilgan. Hindiston, Xitoy, AQSH, Buyuk Britaniya, Yaponiya, Janubiy Koreya, Shri-Lanka va Bangladesh o‘z qutqaruv guruhlarini yuborishga tayyorligini bildirgan.
