O‘zbekiston mustaqil sayohatlar uchun dunyoning eng yaxshi beshligiga kirdi
Reytingda mamlakatning tarixiy merosi, tabiati va turizm imkoniyatlari yuqori baholangan.
Nufuzli xalqaro sayyohlik platformasi “Much Better Adventures” tomonidan e’lon qilingan “Solo Travel Index 2026” reytingida O‘zbekiston mustaqil sayohatlar uchun dunyoning eng yaxshi yo‘nalishlari beshligidan joy oldi.
Reytingni tuzishda sayohatchilarning taassurotlari, Global Peace Index, viza olish qulayligi, ovqatlanish xarajatlari, yo‘nalishlarning xilma-xilligi hamda piyoda sayohat qilish imkoniyatlari kabi bir qator mezonlar hisobga olingan.
Platforma O‘zbekistonning Buyuk Ipak yo‘li merosi, boy tarixiy-madaniy salohiyati, tabiiy landshaftlari va rivojlangan turizm infratuzilmasini mamlakatning asosiy ustunliklari sifatida qayd etgan.
Xususan, sayyohlarga Nurota tog‘laridagi qadimiy so‘qmoqlar bo‘ylab sayohat qilish, mahalliy qishloqlar hayoti bilan tanishish, an’anaviy o‘tovlarda tunash hamda Qizilqum orqali Oydarko‘lga borish kabi imkoniyatlar tavsiya etilgan.
Shuningdek, Samarqand, Buxoro, Xiva va boshqa tarixiy shaharlar Buyuk Ipak yo‘li chorrahasida shakllangan noyob tarixiy va madaniy merosni namoyon etuvchi muhim sayyohlik maskanlari sifatida e’tirof etilgan.
Mazkur xalqaro reyting O‘zbekistonning jahon turizm xaritasidagi mavqei tobora mustahkamlanayotganini, mamlakat tarixiy meros, tabiat va zamonaviy turizm imkoniyatlarini uyg‘unlashtirgan istiqbolli yo‘nalishlardan biri sifatida e’tirof etilayotganini ko‘rsatadi.
