Urushning davom etishi mintaqa va dunyoga zarar yetkazadi — Pezeshkian
Eron prezidenti AQSHning Eronga qarshi harbiy harakatlarni qayta boshlashi salbiy oqibatlarga olib kelishi mumkinligini aytdi.
Eron prezidenti Masud Pezeshkian AQSHning Eronga qarshi harbiy harakatlarni qayta boshlashi mamlakat, mintaqa va butun dunyo uchun salbiy oqibatlarga olib kelishini taʼkidladi.
Pezeshkian bu haqda Qatar bosh vaziri va tashqi ishlar vaziri Muhammad bin Abdulrahmon Ol Soniy bilan uchrashuvda maʼlum qildi.
Eron rahbarining qayd etishicha, mavjud muammolarni harbiy kuch yoki bosim orqali emas, muloqot va diplomatik yo‘l bilan hal qilish lozim.
“Urush Eronga majburan yuklatilgan va uning davom etishi mamlakatga, mintaqaga va dunyoga zarar yetkazadi. Aql-idrok memorandumni amalga oshirishni qayta boshlashimiz va muammolarni urush yoki kuch ko‘rsatish orqali emas, balki muloqot orqali hal qilishimiz kerakligini taqozo etadi”, — degan Pezeshkian.
Uning taʼkidlashicha, Tehron mojaro yoki urushni avj oldirishga intilmaydi. Pezeshkian, shuningdek, Eron va Qatar o‘rtasidagi do‘stona munosabatlar davom etishiga ishonch bildirgan.
