AQSH Venesuela bilan “tarixdagi eng yirik neft bitimi”ni tuzdi
Tramp bitim natijasida AQSHning neft zaxiralari ikki baravardan ko‘proqqa oshishini ma’lum qildi.
AQSH Venesueladagi 65 milliard barreldan ortiq tasdiqlangan neft zaxiralari ustidan nazoratni qo‘lga kiritadigan kelishuv tuzdi. Bu haqda AQSH prezidenti Donald Tramp ma’lum qildi.
Tramp kelishuvni “jahon tarixidagi eng yirik neft bitimi” deb atadi, biroq uning tafsilotlarini ochiqlamadi. Uning aytishicha, bitim natijasida AQSHning neft zaxiralari ikki baravardan ko‘proqqa oshadi, mamlakatda neft yetkazib berish ko‘payadi va benzin narxlari sezilarli darajada pasayadi.
AQSH davlat kotibi Marko Rubioning ta’kidlashicha, kelishuv Venesuelaga qariyb 100 milliard dollar xususiy investitsiya jalb qilish imkonini beradi. Bu mamlakat iqtisodiyotini tiklashga xizmat qilishi kutilmoqda.
Ma’lumot uchun, 2026-yil yanvarida AQSH Venesuelada harbiy operatsiya o‘tkazib, mamlakat prezidenti Nikolas Maduro va uning rafiqasi Siliya Floresni AQSHga olib ketgan. Ularga narkoterrorizm bo‘yicha ayblovlar qo‘yilgan.
Shundan so‘ng Venesuelani avval vitse-prezident lavozimida ishlagan Delsi Rodriges boshqara boshlagan.
