AQSHda “Qiyomat kuni” maxsus harbiy guruhi tuzildi
Bo‘linma inqirozli vaziyatlarda yuqori martabali amaldorlarni xavfsiz evakuatsiya qilish uchun xizmat qiladi.
AQSH Harbiy-havo kuchlari Vashington hududida hukumatning uzluksiz faoliyatini taʼminlashga mo‘ljallangan yangi vertolyot eskadrilyasini tashkil etdi. Bu haqda Endryus aviabazasi matbuot xizmati maʼlum qildi.
Maʼlumotlarga ko‘ra, 24-vertolyot eskadrilyasi Milliy poytaxt mintaqasida favqulodda vaziyatlarda hukumat faoliyatining uzluksizligini taʼminlash missiyalarini qo‘llab-quvvatlaydi.
Yangi bo‘linma global inqiroz, jumladan, yadroviy mojaro kabi favqulodda vaziyatlarda yuqori martabali hukumat amaldorlari va harbiy xizmatchilarni xavfsiz hududlarga tezkor evakuatsiya qilish vazifalarini bajaradi.
Eskadrilya zamonaviy HH-60W Jolly Green II vertolyotlari bilan jihozlanadi. Ushbu texnika bir necha o‘n yillar davomida foydalanilgan UH-1N Huey vertolyotlarini bosqichma-bosqich almashtirishi ko‘zda tutilgan.
Yangi bo‘linma Vashington yaqinidagi Endryus aviabazasida joylashtiriladi. Uning tashkil etilishi AQSH hukumatining inqirozli vaziyatlarda boshqaruvning uzluksizligini taʼminlash bo‘yicha mavjud rejalarining bir qismi hisoblanadi.
AQSH Harbiy-havo kuchlari hukumatning uzluksiz faoliyatini taʼminlash bilan bog‘liq boshqa loyihalarni ham amalga oshirmoqda. Xususan, kelajakda foydalanish uchun yangi maxsus samolyotlarni yaratish bo‘yicha mablag‘ so‘ralgani haqida ham xabar berilgan.
OAV maʼlumotlariga ko‘ra, avvalroq AQSH harbiylari yuqori martabali hukumat amaldorlarini favqulodda vaziyatlarda evakuatsiya qilish bo‘yicha o‘quv mashg‘ulotlarini ham o‘tkazgan.
