“Bunday odamlarga rahm-shafqat bo‘lmaydi” — Japarov
Qirg‘iziston prezidenti jamiyatda beqarorlik keltirib chiqarishga urinayotgan shaxslarga nisbatan qatʼiy choralar ko‘rilishini aytdi.
Sadir Japarov mamlakatdagi vaziyatni beqarorlashtirishga urinayotgan shaxslar qattiq jazolanishini maʼlum qildi.
Davlat rahbari bu haqda Shanxay hamkorlik tashkiloti sammiti va Jahon ko‘chmanchilar o‘yinlari vaqtida xavfsizlikni taʼminlashga masʼul kuch tuzilmalari faoliyatini ko‘zdan kechirish chog‘ida aytgan.
Japarov xavfsizlik idoralarini modernizatsiya qilish, ularning moddiy-texnik bazasini mustahkamlash, xodimlar ish haqini oshirish va ijtimoiy qo‘llab-quvvatlash choralarini kengaytirish bo‘yicha ishlar amalga oshirilayotganini taʼkidlagan.
Prezident mamlakat xavfsizligini taʼminlash Qirg‘izistonning barqarorligi va taraqqiyotining muhim sharti ekanini qayd etib, huquqni muhofaza qiluvchi organlar xodimlarini professionallik, masʼuliyat va xalqqa vijdonan xizmat qilishga chaqirgan.
“Rivojlanishning birinchi va eng muhim sharti — temir intizom”, degan Japarov.
Uning taʼkidlashicha, tashqi kuchlar taʼsirida jamiyatda beqarorlik keltirib chiqarishga, qasos olishga chaqirishga yoki mamlakatdagi vaziyatni izdan chiqarishga urinayotgan shaxslarga nisbatan qatʼiy choralar ko‘riladi.
“Bunday odamlarga rahm-shafqat bo‘lmaydi”, deya taʼkidlagan Qirg‘iziston prezidenti.
Japarov mamlakat kuchi xalqning birlik va hamjihatligida ekanini taʼkidlab, jamiyatdagi totuvlik barqarorlik va farovonlikning muhim omili ekanini qayd etgan.
