Halok bo‘lgan qutqaruvchining oilasi e’tiborsiz qolmadi: 3 xonali uy berildi
Yangi xonadonning kaliti xizmat vazifasini bajarish chog‘ida halok bo‘lgan qutqaruvchining yaqinlariga topshirildi.
Qashqadaryo viloyatining Koson tumanida xizmat burchini bajarish vaqtida halok bo‘lgan qutqaruvchining oilasiga yangi xonadon berildi. Bu haqda FVV xabar berdi.
O‘zbekiston mustaqilligining 35-yilligi arafasida Favqulodda vaziyatlar vaziri, general-mayor Azizbek Ikramov marhum oddiy askar Omonturdiyev Eldor Ismoil o‘g‘lining oilasiga barcha qulayliklarga ega uch xonali xonadon kalitini tantanali ravishda topshirdi.
Tadbirda qahramon qutqaruvchining Vatan va xalq manfaatlari yo‘lida fidokorona xizmat qilgani, uning xotirasiga hurmat va ehtirom ko‘rsatish muhimligi ta’kidlandi.
Qayd etilishicha, yangi xonadon marhumning oila a’zolariga ko‘rsatilayotgan e’tibor va g‘amxo‘rlikning amaliy ifodasi bo‘ldi.
Avvalroq, Prezidentning 22-avgustdagi farmoniga muvofiq, 15-avgust kuni Toshkentning Uchtepa tumanida yong‘in vaqtida fuqarolarni qutqarish chog‘ida halok bo‘lgan FVV xodimi Boburmirzo Pardayev hamda Farg‘ona viloyatida xizmat vazifasini bajarayotganda mast haydovchi boshqaruvidagi avtomobil urib ketishi oqibatida vafot etgan YPX xodimi Xayitbek Karimjonov vafotidan so‘ng “Jasorat” medali bilan taqdirlangandi.
