Isroil G‘azodagi tibbiy buyumlar saqlanadigan omborga zarba berdi

Isroilning G‘azo sektori bo‘ylab uyushtirgan hujumlarida kamida ikki kishi halok bo‘ldi, 18 kishi jarohatlandi. Bu haqda Al Jazeera xabar berdi.

 

Shuningdek, Dayr al-Balah shahridagi shifoxona majmuasida tibbiy buyumlar ombori sifatida foydalanilgan chodirga berilgan zarba oqibatida uch kishi yaralangan.

 

Shanba kuni Isroil droni Al-Aqso shahidlari shifoxonasi hududidagi tibbiy buyumlar omboriga zarba bergan. Shifoxona direktori uch kishi jarohatlanganini bildirgan. Isroil harbiylari zarbani tasdiqlab, hujum vaqtida HAMAS qo‘mondoni nishonga olinganini ma’lum qilgan, biroq bu da’voni tasdiqlovchi dalil keltirmagan.

 

G‘azo shahridagi Tal al-Havo mahallasida ham Isroil droni velosipedga zarba bergan. Falastinning Wafa agentligi xabariga ko‘ra, hujumda bir kishi halok bo‘lgan, ikki kishi jarohatlangan. Yana bir kishi Dayr al-Balah sharqidagi al-Musaddar qishlog‘ida Isroil askarlarining o‘q uzishi oqibatida halok bo‘lgan.

 

Bundan tashqari, Isroil kvadrokopteri G‘azoning shimolidagi Kamol Advan shifoxonasi yaqiniga portlovchi moslama tashlagan.

 

G‘azo Sog‘liqni saqlash vazirligi so‘nggi 48 soat ichida to‘qqiz nafar yangi halok bo‘lgan va vayronalar ostidan topilgan bir kishining jasadi, shuningdek, 18 nafar yarador olib kelinganini ma’lum qildi.

 

Vazirlikka ko‘ra, boshqa qurbonlar vayronalar ostida yoki tez yordam va fuqaro muhofazasi xodimlari yetib bora olmayotgan hududlarda qolib ketgan.

 

Vazirlik ma’lumotiga ko‘ra, o‘tgan yil oktyabrda Isroil va HAMAS o‘rtasidagi “o‘t ochishni to‘xtatish” kuchga kirganidan buyon Isroil hujumlari oqibatida 1313 nafar falastinlik halok bo‘lgan.

 

So‘nggi kunlarda Isroil G‘azo bo‘ylab hujumlarini kuchaytirgan. Bu hujumlar “o‘t ochishni to‘xtatish” kelishuviga qaramay davom etmoqda.