Nepaldagi suv toshqinlarida bedarak yo‘qolganlar soni 1 900 nafarga yetdi

 

Nepalda kuchli suv toshqinlari oqibatida bedarak yo‘qolganlar soni 1 900 nafarga yetdi. Tabiiy ofat oqibatida kamida 580 kishi halok bo‘lgan. Bu haqda The New York Times Nepalning tabiiy ofatlarga yordam agentligidagi manbaga tayanib xabar berdi.

 

Qidiruv-qutqaruv ishlari davom etar ekan, qurbonlar va bedarak yo‘qolganlar soni ortib bormoqda. Mutasaddilar falokat ko‘lami va uning oqibatlarini aniqlash ishlarini davom ettirmoqda.

 

Shuningdek, Xitoyning Tibet hududida ham 500 dan ortiq kishi bedarak yo‘qolgani, kamida 5 kishi halok bo‘lgani ma’lum qilingan.

 

Nepal hukumati xorijiy qutqaruv mutaxassislariga tabiiy ofat oqibatlarini bartaraf etish ishlarida ishtirok etishga ruxsat bergan. Cheklangan miqdordagi xorijiy mutaxassislar halok bo‘lganlarning shaxsini aniqlash va jasadlarni yaqinlariga topshirish jarayoniga jalb etiladi.

 

Eslatib o'tamiz, kuchli suv toshqini 26-avgust kuni Nepalning shimoliy qismida yuz bergan edi. Dastlabki ma’lumotlarga ko‘ra, bunga Xitoy chegarasi yaqinida yuz bergan tosh va qor ko‘chkisi sabab bo‘lgan. Suv, tosh va loy oqimi daryo bo‘ylab qariyb 70 kilometr masofaga tarqalib, aholi punktlariga jiddiy zarar yetkazgan.

 

Rossiyaning Nepaldagi elchixonasi ham tabiiy ofat hududida bo‘lgan bo‘lishi mumkin bo‘lgan sakkiz nafar Rossiya fuqarosi bilan aloqa uzilganini ma’lum qildi. Ularni qidirish ishlari davom etmoqda.