“Qozog‘iston yadroviy qurolga qarshi siyosatini davom ettiradi” — Toqayev
Qozog‘iston prezidenti yadroviy kuchlarni muzokaralarga chaqirib, yadroviy sinovlarni taqiqlash to‘g‘risidagi shartnomaning kuchga kirishi zarurligini taʼkidladi.
Qosim-Jomart Toqayev mamlakat yadroviy qurolga qarshi global harakatdagi yetakchi mavqeini saqlab qolishini va yadroviy kuchlar o‘rtasida muzokaralarni davom ettirish tarafdori ekanini bildirdi.
Bu haqda davlat rahbarining Xalqaro yadroviy sinovlarga qarshi kurash kuni munosabati bilan Qozog‘iston xalqiga yo‘llagan murojaatida ma’lum qilindi.
Toqayev Qozog‘iston yadroviy davlatlarni muzokaralarga chaqirish, Yadroviy sinovlarni har tomonlama taqiqlash to‘g‘risidagi shartnomaning tezroq kuchga kirishini ta’minlash hamda yadroviy qurol tahdidini kamaytirish bo‘yicha ko‘p tomonlama saʼy-harakatlarni qo‘llab-quvvatlashini ta’kidlagan.
Prezidentning qayd etishicha, yadro energiyasi faqat tinch va konstruktiv maqsadlarga xizmat qilishi lozim. U Qozog‘istonda o‘tkazilgan milliy referendumda xalq yadro energetikasini rivojlantirishni qo‘llab-quvvatlaganini ta’kidlagan.
Toqayev, shuningdek, Qozog‘iston tashabbusi bilan BMT Bosh Assambleyasi tomonidan Xalqaro yadroviy sinovlarga qarshi kurash kuni taʼsis etilganini eslatib o'tgan.
Bundan 35 yil avval, 1991-yil 29-avgustda Semipalatinsk yadroviy poligoni yopilgan. Qozog‘iston rahbarining taʼkidlashicha, ushbu sana yadroviy sinovlarning insoniyat uchun fojiali oqibatlarini eslatib, ularning takrorlanishiga yo‘l qo‘ymaslik zarurligini ko‘rsatadi.
Toqayev Qozog‘istonning sobiq Sovet Ittifoqidan meros bo‘lib qolgan yirik yadroviy arsenaldan ixtiyoriy ravishda voz kechganini mamlakatning tinchlik, xavfsizlik va barqaror rivojlanish yo‘lidagi tarixiy tanlovi sifatida baholagan.
