Qozog‘istonda o‘zbekistonlik erkak ish joyida pichoqlab o‘ldirildi
U mijoz bilan yuzaga kelgan mojaro ortidan 56 yoshli erkak tomonidan pichoqlangan.
Qozog‘istonning Olmaota viloyati Aktas qishlog‘ida O‘zbekiston fuqarosi ish joyida pichoqlab o‘ldirildi. Bu haqda KTK xabar berdi.
Ma’lum qilinishicha, 35 yoshli erkak tandir noni sotiladigan do‘konda ishlagan. U mijoz bilan yuzaga kelgan mojaro ortidan 56 yoshli erkak tomonidan pichoqlangan. Gumondor jabrlanuvchining ko‘krak qismiga ikki marta pichoq urgan.
Voqea joyida tez tibbiy yordam ko‘rsatilganiga qaramay, erkak olgan jarohatlari oqibatida vafot etgan.
Mahalliy aholining so‘zlariga ko‘ra, marhum so‘nggi besh yil davomida ushbu do‘konda ishlagan va yaxshi obro‘ga ega bo‘lgan. U juma kunlari aholiga bepul non tarqatgani ham aytilmoqda.
Mazkur holat yuzasidan Qozog‘iston politsiyasi tomonidan qotillik moddasi bo‘yicha jinoyat ishi qo‘zg‘atilgan. 56 yoshli gumondor qo‘lga olinib, vaqtincha saqlash hibsxonasiga joylashtirilgan. U aybini tan olgan.
