Surxondaryoda ta’tildagi xodimni majburan ishga chiqargan rahbar jazolandi
Uzun tumanidagi davlat muassasasida xodim qonuniy taʼtilda bo‘lishiga qaramay, roziligisiz ishga jalb etilgani aniqlandi.
Ijtimoiy tarmoqlarda Surxondaryo viloyati Uzun tumani Suv yetkazib berish xizmati davlat muassasasida mehnat qonunchiligi buzilgani, xususan, ta’tilda bo‘lgan xodim majburiy ravishda ishga jalb etilgani va unga nisbatan tahdidli munosabat bildirilgani haqida xabarlar tarqaldi.
Mazkur holat Davlat mehnat inspeksiyasi tomonidan o‘rganib chiqildi.
O‘rganish davomida xodim qonuniy ta’til davrida uning roziligisiz mehnatga jalb etilgani, natijada majburiy mehnatga yo‘l qo‘yilgani aniqlangan.
Aniqlangan qonunbuzilish yuzasidan muassasa rahbariga nisbatan O‘zbekiston Respublikasi Ma’muriy javobgarlik to‘g‘risidagi kodeksining 51-moddasiga asosan ma’muriy javobgarlik chorasi qo‘llanilgan.
Davlat mehnat inspeksiyasi majburiy mehnatga yo‘l qo‘yish qonunbuzilish ekanini eslatib, ish beruvchilarni xodimlarning mehnat huquqlariga qat’iy rioya qilishga chaqirdi.
