Vashingtonda Tramp siyosatiga qarshi ommaviy namoyish o‘tkazildi
Namoyish ishtirokchilari ovoz berish huquqlarini himoya qilish va fuqarolik huquqlarini cheklovchi siyosatga chek qo‘yishga chaqirgan.
AQSH poytaxti Vashington shahrida bir necha ming kishi ishtirokida Tramp maʼmuriyati siyosatiga qarshi namoyish bo‘lib o‘tdi. TASSning xabar berishicha, tadbir National Mall hududida, Oq uy yaqinida tashkil etilgan.
“Vashingtonga yurish: 2026. Ovoz berish huquqlarini himoya qiling” nomli namoyish ishtirokchilari dastlab Avraam Linkoln yodgorligi oldida to‘plangan. Tadbir 1963 yilda Vashingtonda o‘tkazilgan Ish o‘rinlari va Ozodlik uchun yurishning 63 yilligiga bag‘ishlangan.
Namoyishda kasaba uyushmalari vakillari, talabalar, fuqarolik huquqlari faollari hamda turli jamoat tashkilotlari ishtirok etgan. Tadbir davomida siyosatchilar va ijtimoiy harakatlar yetakchilari so‘zga chiqqan.
Mustaqil senator Berni Sanders AQSHda siyosiy va iqtisodiy erkinliklar o‘zaro chambarchas bog‘liq ekanini taʼkidlagan. U ovoz berish huquqlari, ishchilar manfaatlari, daromadlar tengsizligi va saylov kampaniyalarini moliyalashtirish bilan bog‘liq masalalarga eʼtibor qaratgan.
Vakillar palatasidagi Demokratlar ozchilik yetakchisi Xakim Jeffris esa mamlakat “chorrahada” turganini aytib, Kongressning har ikki palatasida siyosiy nazoratni qayta qo‘lga kiritish zarurligini bildirgan.
Namoyishchilar, shuningdek, AQSH maʼmuriyatining ovoz berish tartiblariga oid siyosatini tanqid qilib, fuqarolik huquqlarini himoya qilishga chaqirgan. Ular “Tramp, saylovlardan qo‘lingizni torting!”, “Orzu hali amalga oshmadi!” kabi shiorlar yozilgan plakatlarni ko‘tarib chiqqan.
Tadbir davomida namoyishchilar National Mall bo‘ylab yurish qilib, fuqarolik va saylov huquqlarini himoya qilishga chaqirgan. Politsiya xavfsizlik chorasi sifatida hududdagi qator ko‘chalarni yopgan.
Namoyish ishtirokchilari AQSHda fuqarolik huquqlari, tenglik va ovoz berish imkoniyatlarini taʼminlash bo‘yicha kurash davom etayotganini taʼkidlagan.
Tadbir 1963 yilda Martin Lyuter King tomonidan Vashingtonda aytilgan mashhur “Mening orzuim bor” nutqi bilan bog‘liq tarixiy joylarda o‘tkazilgani bilan ham eʼtibor qaratgan.
