Xitoyda sobiq Xubey rahbari poraxo'rlikda ayblanib o‘limga hukm qilindi
U qariyb 111 mln dollar miqdorida pora olganlikda aybdor deb topilgan.
Xitoy sudi sobiq Xubey provinsiyasi Kommunistik partiyasi rahbari Jiang Chaoliangni korrupsiya ishi bo‘yicha ikki yillik kechiktirish bilan o‘lim jazosiga hukm qildi. Bu haqda Xitoy davlat televideniyesi CCTVga tayanib Reuters xabar bermoqda.
Sud Jiang Chaoliangni jami 746 mln yuandan ortiq, taxminan 111 mln dollar miqdorida pora olganlikda aybdor deb topgan.
Jiang Chaoliang Xubey provinsiyasidagi Kommunistik partiya qo‘mitasiga rahbarlik qilgan. Shuningdek, u Xitoyning yirik davlat moliya institutlarida rahbarlik lavozimlarida ishlagan. U Qishloq xo‘jaligi banki raisi, Xitoy taraqqiyot banki prezidenti va Bank of Communications raisi lavozimlarini egallagan.
Jiang Chaoliang 2020-yilda COVID-19 pandemiyasi boshlangan paytda Xubeydagi eng yuqori martabali amaldor sifatida keng e’tibor qozongan. U koronavirusning dastlabki tarqalishi davrida vaziyatni boshqarishi tanqid qilinganidan so‘ng partiyaning Xubeydagi rahbari lavozimidan chetlatilgan.
Ma’lumot uchun, Xitoyda ikki yillik kechiktirish bilan o‘lim jazosi odatda mahkum belgilangan muddat davomida jiddiy qonunbuzarlik sodir etmasa, jazo umrbod qamoq jazosiga almashtirilishini anglatadi.
