O‘zbekistonga Hindistondan olib kelinadigan go‘shtning halolligi nazorat qilinadi
O‘zbekiston mutaxassislari Hindistonga borib, hayvonlarni so‘yish va go‘shtni tayyorlash jarayonlarida ishtirok etadi.
O‘zbekiston Hindistondan go‘sht importini kengaytirish va bu yo‘nalishda qo‘shma korxonalar faoliyatini rivojlantirishni rejalashtirmoqda. Bu haqda qishloq xo‘jaligi vaziri Ibrohim Abdurahmonov ma’lum qildi.
Vazirning aytishicha, Hindistondagi nisbatan arzon go‘shtni O‘zbekiston bozoriga olib kirish uchun qo‘shma korxonalar tashkil etilgan va yangi kelishuvlarga erishilgan.
Go‘sht mahsulotlarining halolligi va xavfsizligini ta’minlash uchun O‘zbekiston mutaxassislari Hindistonga borib, hayvonlarni so‘yish va go‘shtni tayyorlash jarayonlarida ishtirok etadi. Go‘sht tegishli xalqaro va halol sertifikatlar bilan ta’minlangach, O‘zbekistonga eksport qilinadi.
Logistika masalasida Turkiya orqali, xususan, Mersin portidan foydalanish bo‘yicha uch tomonlama hamkorlik yo‘lga qo‘yilmoqda.
Shuningdek, O‘zbekiston va Hindiston o‘rtasidagi qishloq xo‘jaligi mahsulotlari savdo aylanmasi so‘nggi yillarda uch barobardan ko‘proq oshgani qayd etildi.
Ayni paytda O‘zbekistonda ishlab chiqariladigan 30 dan ortiq turdagi mahsulotni Hindiston bozoriga eksport qilish imkoniyati mavjud.
