Saida Mirziyoyeva O‘zbekiston xalqini Mustaqillik bayrami bilan tabrikladi
Prezident Administratsiyasi rahbari o‘z tabrigida mamlakat rivoji oldida qator yirik vazifalar turganini ta’kidladi.
Prezident Administratsiyasi rahbari Saida Mirziyoyeva O‘zbekiston Mustaqilligi kuni munosabati bilan tabrik yo‘lladi.
U O‘zbekiston Mustaqilligi kuni so‘nggi yillarda tubdan yangilanib, dadil ilgarilayotgan mamlakatning ulug‘ ayyomi ekanini ta’kidladi.
«Prezidentimiz Shavkat Mirziyoyev o‘z nutqida kelgusi o‘n yillikni “Milliy yuksalish davri” deb e’lon qildilar», — deb yozdi Saida Mirziyoyeva.
Uning qayd etishicha, oldinda keng ko‘lamli milliy dasturlarni amalga oshirish va muhim vazifalarni hal etish turibdi. Jumladan, bilim va ko‘nikmalarni amaliy kapitalga aylantirish, aholi salomatligi va uzoq umr ko‘rishini ta’minlash, yuqori texnologiyalarga asoslangan iqtisodiyotni barpo etish, suv resurslaridan oqilona foydalanish va atrof-muhitni asrash, qonun ustuvorligini to‘liq kafolatlash, mahalla institutini mustahkamlash hamda O‘zbekistonning xalqaro maydondagi obro‘-e’tiborini yanada yuksaltirish shular jumlasidandir.
«Bayraming muborak bo‘lsin, jonajon O‘zbekistonim!» — deya tabrikni yakunladi Saida Mirziyoyeva.
