Istanbulda adashib masjidga kelib qolgan 13 yoshli o‘zbekistonlik qiz onasiga topshirildi
Masjid imomi xabar bergach, diplomatlar voyaga yetmagan bolani konsulxonaga olib kelib, uning yaqin qarindoshlari bilan bog‘langan.
O‘zbekistonning Istanbuldagi Bosh konsulxonasi 13 yoshli O‘zbekiston fuqarosi S.J. bilan bog‘liq holat yuzasidan rasmiy munosabat bildirdi.
Bosh konsulxona ma’lumotiga ko‘ra, 30-avgust kuni soat 22:30 da Beyog‘lu tumanidagi masjidlardan birining imomi konsulxonaga qo‘ng‘iroq qilib, voyaga yetmagan O‘zbekiston fuqarosi haqida xabar bergan.
Diplomatlar zudlik bilan voqea joyiga borib, S.J.ni Bosh konsulxonaga olib kelgan. Shundan so‘ng uning yaqin qarindoshlarini aniqlash va ular bilan bog‘lanish bo‘yicha tegishli choralar ko‘rilgan.
1-sentyabr kuni 13 yoshli S.J. sog‘-salomat onasiga topshirilgan.
Bosh konsulxona ushbu holatda yordam ko‘rsatgan Turkiyaning tegishli idoralari hamda fuqarolariga minnatdorlik bildirgan.
