Andijondagi “G‘amxo‘rlik” markazida bolalarga zo‘ravonlik qilingani aniqlandi
O‘rganish yakunlariga ko‘ra, 6 nafar tarbiyachi va 1 nafar hamshira ishdan bo‘shatildi.
Andijon viloyati Qo‘rg‘ontepa tumanida joylashgan nogironligi bo‘lgan bolalar uchun “G‘amxo‘rlik” markazida bolalarga nisbatan jismoniy zo‘ravonlik qilingani aks etgan videolar ijtimoiy tarmoqlarda tarqaldi.
Mazkur holat yuzasidan Ijtimoiy himoya milliy agentligi Andijon viloyati boshqarmasi xodimlari tomonidan o‘rganish ishlari olib borildi.
O‘rganish natijalariga ko‘ra, videolarda aks etgan 6 nafar tarbiyachi va 1 nafar hamshira egallab turgan lavozimidan ozod etilgan. Ular bilan tuzilgan mehnat shartnomalari qonunchilikda belgilangan tartibda bekor qilingan.
Shuningdek, tarbiyachilar faoliyatini yetarli darajada nazorat qilmagan mas’ul xodimlarga nisbatan intizomiy choralar ko‘rilgan.
Markazdagi bolalar hududiy tibbiyot birlashmasi mutaxassislari ishtirokida tibbiy ko‘rikdan o‘tkazilgan.
Bundan tashqari, bolalar xavfsizligini ta’minlash maqsadida “G‘amxo‘rlik” markazidagi o‘yin maydonlari atrofiga qo‘shimcha kuzatuv kameralari o‘rnatilgan.
