Eron Yaqin Sharqdagi AQSH harbiy pozitsiyalariga javob zarbasini berdi
Hujumlar raketalar va dronlar yordamida amalga oshirilgan.
Eron Yaqin Sharqdagi AQSH harbiy pozitsiyalariga qarshi javob zarbalarini amalga oshirdi. Bu haqda “Fars” axborot agentligi Telegram kanalida maʼlum qildi.
Agentlik maʼlumotiga ko‘ra, hujumlar raketalar va uchuvchisiz uchish apparatlari yordamida amalga oshirilgan.
Eron Qurolli Kuchlari Bosh shtabi AQSHning mamlakat janubidagi Siston va Balujiston hamda Hormozgon viloyatlaridagi nishonlarga bergan zarbalariga javoban Eron Qurolli Kuchlari AQSHga qarshi javob choralarini ko‘rayotganini bildirgan.
Avvalroq AQSH harbiylari Eronning janubiy hududlaridagi nishonlarga, jumladan, Hormuz bo‘g‘ozi hududidagi obyektlarga zarbalar bergani haqida xabarlar tarqalgan edi. Shuningdek, AQSH kuchlari Larak orolidagi Eron raketa uchirish qurilmalariga hujum qilgani maʼlum qilingan.
AQSH Markaziy qo‘mondonligi (CENTCOM) ham Erondagi qator nishonlarga zarbalar berilganini bildirgan. Eronning janubiy qirg‘oqlari, jumladan, Qeshm oroli va ayrim qirg‘oqbo‘yi hududlarida portlashlar sodir bo‘lgani haqida xabar berilgan.
AQSH prezidenti Donald Tramp avvalroq Amerika nishonlariga qarshi yangi hujumlar uyushtirilgan taqdirda Eronga qarshi keskin choralar ko‘rilishi haqida ogohlantirgan edi.
