O‘zbekistonda doimiy aholi soni 39 milliondan oshdi
Shavkat Mirziyoyev aholi va qishloq xo‘jaligini ro‘yxatga olish yakunlari hamda statistika tizimini rivojlantirish bo‘yicha takliflar bilan tanishdi.
Prezident Shavkat Mirziyoyevga aholi va qishloq xo‘jaligini ro‘yxatga olish yakunlari hamda milliy statistika tizimini rivojlantirishga qaratilgan takliflar taqdim etildi.
Dastlabki natijalarga ko‘ra, O‘zbekistonda doimiy aholi soni 39 million 47 ming nafarni tashkil etgan. Ro‘yxatga olish davomida amaldagi hisobda aks etmagan 810,6 ming nafar aholining yashash manzili va ijtimoiy maqomiga aniqlik kiritilgan.
Shuningdek, hududlar kesimida aholi soniga oid ma’lumotlar qayta aniqlashtirilgan. Jumladan, Jizzax viloyatida aholi soni amaldagi hisobga nisbatan 2,7 foiz, Namanganda 1,3 foiz, Surxondaryoda 0,9 foiz va Qashqadaryoda 0,7 foiz kam ekani aniqlangan. Toshkent tumani aholisi esa avvalgi hisobga nisbatan 1,6 barobar ko‘p ekani ma’lum bo‘lgan.
Qishloq xo‘jaligini ro‘yxatga olish natijasida hisobda aks etmagan 985,5 ming gektar yerning chegarasi va toifasi ham aniqlashtirilgan. Shundan 789,5 ming gektari ekin yerlari, 14,1 ming gektari issiqxonalar, 75,3 ming gektari bog‘lar, 21,4 ming gektari tokzorlar va 85 ming gektari baliqchilik havzalariga to‘g‘ri keladi.
Jarayonlarning raqamlashtirilgani natijasida ro‘yxatga olish xarajati aholi jon boshiga 1,5 ming so‘mdan oshmagan. Internet orqali ro‘yxatga olish qamrovi 82,3 foizni tashkil etgan, barcha jarayonlar 15 kunda yakunlangan.
Ro‘yxatga olish natijalari asosida aholi va qishloq xo‘jaligining doimiy yangilanib boradigan statistik registrlari shakllantiriladi. Shuningdek, ijtimoiy-iqtisodiy rivojlanish dasturlariga oid 100 ta hamda qishloq xo‘jaligi va ekin maydonlariga doir 50 ta ko‘rsatkich yangilanadi.
Taqdimotda iqtisodiy faoliyatni to‘liq statistik hisobga olish masalasiga ham alohida e’tibor qaratildi. Hozirda kuzatilmaydigan iqtisodiyot ulushi 23 foiz yoki 246 trillion so‘mni tashkil etmoqda. Mehnat bilan band 15,2 million aholining 6,5 million nafari daromadlari rasmiy hisobda to‘liq aks etmayotgan qatlam sifatida qayd etilgan.
Shu munosabat bilan joriy yilning 15-oktabridan 30-noyabriga qadar biznesni ro‘yxatga olish tadbirini o‘tkazish taklifi ma’qullandi. Tadbir doirasida mamlakatda faoliyat yuritayotgan barcha iqtisodiy birliklar xatlovdan o‘tkaziladi.
Milliy statistika tizimini 2030-yilgacha rivojlantirish bo‘yicha rejalar ham belgilandi. Unga ko‘ra, tadbirkorlar taqdim etadigan hisobot yukini 20 foizga qisqartirish, ma’muriy va muqobil ma’lumotlar manbalari sonini 1,7 barobar oshirish rejalashtirilgan.
Shuningdek, Ma’lumotlarni boshqarish komissiyasini tashkil etish, 2027-yil 1-iyulga qadar Milliy ma’lumotlar platformasini ishga tushirish va statistik ma’lumotlarni sun’iy intellekt tizimlari o‘qiy oladigan formatlarda e’lon qilish ko‘zda tutilmoqda.
2027-yil yakuniga qadar aholi, demografiya, qishloq xo‘jaligi, infratuzilma va hududiy rivojlanishga oid ma’lumotlar geofazoviy raqamli xaritalarda aks ettirilishi rejalashtirilgan.
Taqdimotda “Statistikani rivojlantirish – 2030” milliy strategiyasi loyihasi ham ko‘rib chiqildi.
Prezident aniq, tezkor va ishonchli statistika davlat siyosatini belgilash, hududlar va tarmoqlarni rivojlantirish bo‘yicha to‘g‘ri qarorlar qabul qilishning muhim sharti ekanini ta’kidladi.
Mutasaddilarga ro‘yxatga olish natijalarini chuqur tahlil qilib, davlat dasturlarida keng qo‘llash, biznesni ro‘yxatga olish tadbirini sifatli tashkil etish va milliy statistika tizimini xalqaro standartlar asosida rivojlantirish bo‘yicha topshiriqlar berildi.
