"Rossiya osmoni butunlay xavfli bo‘lib bormoqda" — Zelenskiy
Ukraina prezidenti Rossiya havo hududidan foydalanayotgan aviakompaniyalarni dron hujumlari sabab xavf kuchayayotganidan ogohlantirdi.
Vladimir Zelenskiy Rossiya havo hududidan foydalanayotgan aviakompaniyalar, sug‘urta kompaniyalari va xorijiy davlatlarni parvozlar xavfsizligi bilan bog‘liq xatarlar kuchayayotganidan ogohlantirdi.
Zelenskiy 1 sentyabr kuni kechki videomurojaatida Rossiya tomonidan Ukrainaga qarshi boshlangan urush oqibatlari mamlakat hududidan tashqariga ham taʼsir qilayotganini taʼkidlagan. Uning so‘zlariga ko‘ra, Ukrainaning uzoq masofali dron operatsiyalari kengayib borishi sabab Rossiya havo hududidan foydalanish tobora xavfli tus olmoqda.
“Rossiya havo hududi amalda yopiladi; Rossiya boshlagan urush uning osmonini yopmoqda”, — degan Ukraina prezidenti.
Zelenskiy Ukraina fuqarolik aviatsiyasiga tahdid solmasligini, biroq Rossiya havo hududida dronlar soni va ko‘lamini hisobga olish zarurligini bildirgan. U Rossiyaning Moskva, Sankt-Peterburg va boshqa yirik shaharlardagi aeroportlariga parvozlarni amalga oshirayotgan aviakompaniyalarni vaziyatga jiddiy eʼtibor qaratishga chaqirgan.
Ukraina prezidenti, shuningdek, Rossiya osmonida “xavfsiz davrlar tugaganini” taʼkidlab, mamlakatdagi va Moskvadagi xorijiy diplomatik vakolatxonalarni ushbu maʼlumotni o‘z hukumatlariga yetkazishga chaqirgan.
Uning maʼlum qilishicha, Ukraina Tashqi ishlar vazirligi va boshqa tegishli idoralar Rossiya havo hududidagi xavflar bo‘yicha xalqaro tashkilotlarga maʼlumot taqdim etadi.
Zelenskiy Ukraina uzoq masofali dronlar yordamida Rossiyaning harbiy infratuzilmasi va urushni qo‘llab-quvvatlayotgan obyektlariga zarbalar berish siyosatini davom ettirishini bildirgan.
Ukraina havo hududi esa Rossiyaning keng ko‘lamli bosqini boshlangan 2022 yil 24 fevralidan buyon fuqarolik aviatsiyasi uchun yopiq.
