Rossiyada mehnat migrantlari uchun tibbiy ko‘rik qoidalari kuchaytirildi
Endi 30 kundan ortiq qoluvchilar har yili tibbiy ko‘rikdan o‘tishi shart.
Rossiyada 1 sentyabrdan boshlab mehnat migrantlarining tibbiy ko‘rikdan o‘tish tartibiga oid yangi talablar kuchga kirdi.
TASS maʼlumotiga ko‘ra, avval Rossiyaga kirgan migrantlar xavfli yuqumli kasalliklar, OIV infeksiyasi va giyohvand moddalarni isteʼmol qilish holatini aniqlash maqsadida 90 kun ichida tibbiy ko‘rikdan o‘tishi kerak edi. Endilikda ushbu muddat 30 kungacha qisqartirildi.
Shuningdek, Rossiyaga 30 kundan ortiq muddatga kelgan migrantlar har yili tibbiy ko‘rikdan o‘tishi shart. Tekshiruv bilan bog‘liq xarajatlar migrantning o‘zi yoki ish beruvchi tomonidan qoplanadi.
Yangi tartibga ko‘ra, migrantlarni tibbiy ko‘rikdan o‘tkazishda vositachilar ishtirokiga yo‘l qo‘yilmaydi. Tekshiruvlar faqat vakolatli tibbiyot tashkilotlari tomonidan amalga oshiriladi.
Tibbiy ko‘rik vaqtinchalik yashash yoki ishlash uchun ruxsatnoma olish, shuningdek, patentni uzaytirish uchun ham majburiy talab hisoblanadi.
Tekshiruv yakunlari bo‘yicha tibbiy xulosa, jumladan, elektron shaklda rasmiylashtiriladi va tegishli maʼlumotlar Yagona davlat sog‘liqni saqlash axborot tizimiga kiritiladi.
Agar migrantda xavfli yuqumli kasallik, OIV infeksiyasi yoki giyohvand moddalarni isteʼmol qilish holati aniqlansa, tibbiyot tashkilotlari bu haqda 24 soat ichida Rossiya Ichki ishlar vazirligi va Rospotrebnadzorga xabar berishi lozim.
