Shavkat Mirziyoyev Islom Karimov haykali poyiga gulchambar qo‘ydi
Toshkent, Samarqand va Qarshi shaharlarida Islom Karimov xotirasiga bag‘ishlangan marosim o‘tkazildi.
2-sentabr kuni Toshkent shahrida O‘zbekistonning Birinchi Prezidenti Islom Karimov xotirasiga bag‘ishlangan marosim bo‘lib o‘tdi.
Prezident Shavkat Mirziyoyev Islom Karimov nomidagi ilmiy-ma’rifiy yodgorlik majmuasiga tashrif buyurib, Birinchi Prezident haykali poyiga gulchambar qo‘ydi.
Marosimda Islom Karimovning mamlakat mustaqilligini mustahkamlash, milliy davlatchilikni tiklash, tinchlik va barqarorlikni ta’minlash hamda xalq farovonligini yuksaltirish yo‘lidagi xizmatlari yodga olindi.
Qur’on tilovat qilinib, duo o‘qildi.
Tadbirda Oliy Majlis palatalari, Prezident Administratsiyasi, Vazirlar Mahkamasi, vazirlik va idoralar vakillari, ziyolilar hamda Toshkent shahri jamoatchiligi ishtirok etib, Islom Karimov haykali poyiga gullar qo‘ydi.
Xotira tadbirlari Samarqand va Qarshi shaharlarida ham o‘tkazildi.
