Turkiya aviakompaniyalari Moskvaga ayrim reyslarni vaqtincha bekor qildi
Bunga Vnukovo aeroportidagi vaqtinchalik cheklovlar sabab bo‘lgan.
Moskvadagi Vnukovo aeroporti havo hududiga kiritilgan vaqtinchalik cheklovlar sabab Turkiyaning Pegasus Airlines va Turkish Airlines aviakompaniyalari Moskvaga va Moskvadan amalga oshirilishi rejalashtirilgan qator reyslarni bekor qildi.
Maʼlumotlarga ko‘ra, cheklovlar Moskva vaqti bilan soat 02:45 dan 05:56 gacha amal qilgan. Shu sababli Antaliya, Izmir, Istanbul, Bodrum va Dalaman aeroportlaridan Moskvaga yo‘l olgan ayrim samolyotlar parvozni davom ettira olmay, jo‘nash aeroportlariga qaytgan.
Natijada Pegasus Airlines‘ning Moskvadan Turkiyaning bir qator kurort shaharlariga amalga oshirilishi rejalashtirilgan reyslari ham bekor qilingan. Turkish Airlines ham Istanbul–Moskva yo‘nalishidagi ikki reysni bekor qilgan.
Yo‘lovchilarga parvozlar qayta rejalashtirilishi haqida maʼlum qilingan. Muqobil reyslar bo‘yicha maʼlumotlar keyinroq taqdim etilishi bildirilgan.
Ayrim yo‘lovchilar esa safarlarini davom ettirish maqsadida boshqa reyslarga chipta olgan. Ular qo‘shimcha xarajatlar, jumladan, mehmonxonada tunash bilan bog‘liq sarf-xarajatlarni qoplash masalasini ko‘rib chiqishni rejalashtirmoqda.
