Xorijliklardan O‘zbekistonga kirish vizasi uchun 31 ming dollar olganlar ushlandi
Ular uch nafar xorijiy fuqaroga O‘zbekistonga kirish vizalarini tanishlari orqali rasmiylashtirib berishni vaʼda qilgan.
Toshkent shahrida yashovchi, 1985 yilda tug‘ilgan shaxs uch nafar xorijiy fuqaroga O‘zbekistonga kirish vizalarini tanishlari orqali noqonuniy ravishda rasmiylashtirib berish evaziga 31 200 AQSH dollari olgan vaqtida ashyoviy dalillar bilan ushlangan. Bu haqda DXX xabar berdi.
Tezkor tadbir davomida mazkur shaxs olingan pulning 4 200 dollarini o‘zida olib qolishi, 27 ming dollarini esa poytaxtda yashovchi, 1960 yilda tug‘ilgan fuqaroga berishi kerakligi aniqlangan.
Shundan so‘ng davom ettirilgan tezkor tadbir davomida ikkinchi shaxs ham 27 ming AQSH dollarini olayotgan vaqtida Davlat xavfsizlik xizmati va Iqtisodiy jinoyatlarga qarshi kurashish departamenti xodimlari tomonidan ushlangan.
Hozirda mazkur shaxslarga nisbatan jinoyat ishi qo‘zg‘atilib, tergov harakatlari olib borilmoqda.
