“Yolg‘on gapirish ayrim eronliklar uchun dinining bir qismi” – AQSh Vakillar palatasi spikeri
Spiker Trampning Eronga qarshi urush boshlash qarorini himoya qilib, Tehron bilan muzokaralarda ishonch yo‘qligini aytdi.
AQSH Vakillar palatasi spikeri Mayk Jonson jurnalistlar bilan suhbatda Donald Tramp ma’muriyatining Eronga nisbatan siyosati va fevral oyida boshlangan urush haqida gapirgan. U AQSH prezidenti vaziyatni “barqaror qo‘llarda” boshqarayotganini aytgan. Bu haqda Al Jazeera xabar berdi.
Spiker AQSHning Eron bilan muzokaralardagi asosiy muammolaridan biri sifatida Tehronga ishonib bo‘lmasligini ko‘rsatgan.
“Muammo shundaki, eronliklarga shunchaki ishonib bo‘lmaydi. Ular muzokara stoliga o‘tirib, bir narsani aytishadi, keyin esa ketib, buning aksini qilishadi”, degan Jonson.
Shundan so‘ng u ayrim eronliklarning diniy qarashlari haqida gapirgan. “Ular bizni Buyuk Shayton deb bilishadi va ularning noto‘g‘ri diniy qarashlarida bizni yo‘q qilish istagi bor. Ularni murosaga keltirishning iloji yo‘q”, degan spiker.
Jonson, shuningdek, Eron rejimi AQSH prezidentlarining oldingi siyosatiga zid ravishda yadroviy qurol yaratish imkoniyatlarini izlab kelganini aytgan va bu orqali Tehronning “mafkurasi va aqidaparastligini oxirigacha yetkazish”ga intilayotganini bildirgan.
Spiker yana Eronga qarshi urushni zarur chora sifatida himoya qilgan. Tramp ma’muriyati va uning ittifoqchilari harbiy amaliyotlarni Tehron tomonidan yuzaga kelgan “yaqinlashib kelayotgan” yadroviy tahdidni bartaraf etish zarurati bilan izohlab kelgan.
