Zafarabod tumani hokimi va uning o‘g‘li YTHga uchradi
“MAZ” rusumli yuk mashinasi chapga burilish vaqtida qarama-qarshi yo‘nalishda harakatlanayotgan hokim boshqaruvidagi “KIA Seltos” bilan to‘qnashgan.
Joriy yilning 30 avgust kuni soat 07:45 larda Jizzax viloyati Zafarabod tumani Nurafshon MFY hududidan o‘tuvchi 25V-037 avtomobil yo‘lining 7-kilometrida yo‘l-transport hodisasi sodir bo‘ldi.
Tuman hokimligi axborot xizmati maʼlumotlariga ko‘ra, “MAZ” rusumli yuk avtomashinasini boshqarib kelayotgan B. Mo‘minov chap tomonga burilish vaqtida qarama-qarshi yo‘nalishda harakatlanayotgan Zafarabod tumani hokimi G‘. Eshpo‘latov boshqaruvidagi «KIA Seltos» rusumli xizmat avtomobilining harakatlanish yo‘liga chiqib ketgan.
Natijada transport vositalari to‘qnashgan.
YTH oqibatida Zafarabod tumani hokimi G‘. Eshpo‘latov hamda avtomobilda yo‘lovchi bo‘lgan uning voyaga yetmagan o‘g‘li Sh. Eshpo‘latov turli darajadagi tan jarohatlari bilan Respublika shoshilinch tibbiy yordam ilmiy markazi Jizzax filialining jonlantirish bo‘limiga yotqizilgan.
“MAZ” haydovchisi B. Mo‘minov tan jarohati olmagan.
Mazkur holat yuzasidan 30 avgust kuni Zafarabod tuman prokuraturasi tomonidan Jinoyat kodeksining 266-moddasi 1-qismi bilan jinoyat ishi qo‘zg‘atilgan.
Hozirda holat yuzasidan dastlabki tergov harakatlari olib borilmoqda.
