Barcha mahallalarda ishiga noloyiq hokim yordamchilari yangilanadi
8 992 ta mahalladagi hokim yordamchilari “loyihabay” ishlash tizimiga o‘tkaziladi.
Kredit tarixida kechikishlari bo‘lgan ehtiyojmand aholining loyihalarini ham individual baholash asosida imtiyozli moliyalashtirish imkoniyati yaratiladi.
Shuningdek, Kambag‘allik jamg‘armasidagi 240 milliard so‘m, Bandlik jamg‘armasidagi 100 milliard so‘m hamda uchta “daftar”dagi 760 milliard so‘m mablag‘ tuman shtablari ixtiyoriga beriladi.
Endilikda tuman shtablari subsidiya yoki foizsiz ssuda ajratish masalasini ham mustaqil hal qiladi. Tadbirkorlik kompaniyasining kompensatsiyalar uchun yil yakuniga qadar nazarda tutilgan 300 milliard so‘mlik qoldig‘i ham shtablar orqali ajratiladi.
Shu tariqa tumanlar ixtiyoriga jami 3 trillion 200 milliard so‘m resurs yo‘naltiriladi. Bunda ajratilgan mablag‘larning aniq natija berishiga alohida e’tibor qaratiladi.
Shuningdek, kredit, subsidiya va kompensatsiya shartlarini farmon va qarorlar bilan belgilash amaliyotidan voz kechiladi. Iqtisodiyot vazirligi va Markaziy bank hududlarning salohiyatidan kelib chiqib, moliyalashtirish mexanizmlarini har chorakda yangilab boradi.
Tuman shtablari mahallalardagi hokim yordamchilarini “loyihabay” ishlash tizimiga o‘tkazadi. Buning uchun 8 ming 992 ta mahalladagi hokim yordamchilari vazifa bajaruvchi etib tayinlanadi.
Fidoyi va tashabbuskor kadrlar lavozimiga qayta tayinlanadi, o‘z vazifasini lozim darajada bajara olmayotgan xodimlar esa yangilanadi.
