Ishlaydigan onalarga farzandi bir yoshga to‘lguncha nafaqa to‘lanadi

Shavkat Mirziyoyev raisligida kambag‘allikni qisqartirish va aholi daromadlarini oshirish bo‘yicha ishlarni yangi bosqichga olib chiqish masalalariga bag‘ishlangan yig‘ilishda ehtiyojmand oilalarning ijtimoiy himoyasini kuchaytirish bo‘yicha yangi yondashuvlar belgilandi.

Ijtimoiy himoya milliy agentligiga yil yakuniga qadar ehtiyojmand aholini “Ijtimoiy reyestr”ga kiritish tizimini qayta ko‘rib chiqish topshirildi. Bunda fuqarolarning daromadi bilan birga surunkali kasallik, nogironlik, ko‘p bolalilik va oila a’zosining xorijda ishlayotgani kabi omillarni hisobga oluvchi ko‘p o‘lchovli baholash tizimiga o‘tiladi.

Respublikada kambag‘allik darajasi 3,9 foizga tushgan bo‘lsa-da, 3 yoshgacha farzandi bor oilalarda bu ko‘rsatkich o‘rtacha 6,5 foizni tashkil etayotgani qayd etildi.

Shu munosabat bilan bola parvarishi bilan band ota-onalarni uyida yoki mahallada ishli va daromadli qilishga qaratilgan tizim yo‘lga qo‘yiladi. Ishlaydigan onalarga farzandi bir yoshga to‘lguniga qadar Ijtimoiy sug‘urta jamg‘armasidan nafaqa to‘lanadi.

Mehnatga layoqatsiz ehtiyojmand oilalarga “passiv daromad” keltiradigan ijtimoiy paket uchun joriy yilda 300 milliard so‘m ajratilgan. Ushbu yordamdan foydalangan 11 ming oilaning yarmida daromad sezilarli oshgani qayd etildi. Mazkur tizimni davom ettirish bo‘yicha qaror loyihasini bir hafta muddatda kiritish topshirildi.

Kelasi yildan “Ijtimoiy reyestr”ga kiritilgan oilalar farzandlarining davlat va xususiy bog‘cha badali, o‘quv markazi to‘lovi, yo‘lkirasi hamda oliygohdagi yotoqxona xarajatlari vaucher orqali qoplab beriladi.

Vaucher 12 oy muddatga beriladi va ehtiyojmand oila “Ijtimoiy reyestr”dan chiqarilganidan keyin ham amal qiladi.