Istanbulda ombor yondi: quyuq tutun shahar osmonini qopladi
Istanbulning Tuzla tumanidagi charm sanoati majmuasida joylashgan logistika omborida yong‘in chiqdi. Yong‘in qisqa vaqt ichida kuchayib, atrofdagi hududlarga ham tarqalgan.
Yong‘in bugun ertalab, taxminan soat 10:30 da noma’lum sabab bilan boshlangan. Qisqa vaqt ichida kuchaygan alanga omborni to‘liq qamrab olgan. Omborda kimyoviy moddalar hamda avtomobil ehtiyot qismlari saqlangani xabar qilindi.
Yong‘in natijasida osmonni quyuq qora tutun qoplagan. Tutun Istanbulning bir qator hududlaridan ham ko‘ringan. Omborda kimyoviy moddalar bo‘lgani sababli yong‘in vaqtida bir necha marta kichik portlashlarga o‘xshash ovozlar eshitilgan.
Kuchli shamol ham vaziyatni murakkablashtirgan. Ayrim xabarlarga ko‘ra, hududda shamol tezligi soatiga 40–50 kilometrga yetgan. Shu sababli alanga ombor yonidagi yog‘och materiallar saqlanadigan omborga, boshqa bir ishlab chiqarish korxonasiga va daraxtzor hududga ham o‘tgan.
Xabar olinishi bilan voqea joyiga politsiya, tibbiy yordam xodimlari va 10 ta tumandan ko‘plab yong‘in-qutqaruv ekipajlari jalb etilgan. O‘t o‘chirish ishlarida maxsus texnika, ko‘pik va suv minoralaridan foydalanilgan. Politsiya esa hududga olib boruvchi ayrim yo‘llarni yopib, xavfsizlik choralarini kuchaytirgan.
Alanga aholi yashaydigan hududlarga yaqinlashgani sababli atrofdagi ayrim binolarda bo‘lgan fuqarolar xavfsizlik nuqtayi nazaridan vaqtincha evakuatsiya qilingan. Keyinchalik yong‘inning asosiy qismi nazoratga olingach, xavf ham kamaygan.
Qutqaruvchilarning taxminan uch yarim soatlik sa’y-harakatlaridan so‘ng yong‘in nazoratga olinib, to‘liq o‘chirilgan. Dastlabki ma’lumotlarga ko‘ra, hodisa oqibatida halok bo‘lganlar yoki jarohatlanganlar qayd etilmagan. Yong‘in natijasida logistika ombori jiddiy zarar ko‘rgan va foydalanishga yaroqsiz holga kelgan. Hozirda hududda sovitish ishlari olib borilmoqda.
Yong‘inning kelib chiqish sababi hozircha aniq emas. Hodisa yuzasidan tekshiruv boshlangan.
