Janubiy Koreyada 4 nafar o‘zbekistonlik terrorchilik tashkilotini qo‘llab-quvvatlashda gumon qilinmoqda
Ular Suriyadagi terrorchilik tashkilotiga pul va transport vositalari yuborishda ayblanmoqda.
Janubiy Koreya politsiyasi Suriyada faoliyat yurituvchi Katiba al-Tavhid val-Jihod (KTJ) terrorchilik tashkilotini moliyalashtirish va unga moddiy yordam ko‘rsatishda gumon qilingan to‘rt nafar O‘zbekiston fuqarosiga nisbatan tergov olib bormoqda. Bu haqda Yonhap xabar berdi.
Ma’lum qilinishicha, gumonlanuvchilardan biri 2025-yil aprelidan boshlab KTJga jami 6,3 million von (taxminan 4,6 ming dollar) miqdorida kriptovalyuta yuborganlikda gumon qilinmoqda.
Shuningdek, u guruhdan kriptovalyuta olgani va ushbu mablag‘lar hisobidan umumiy qiymati 170 million von bo‘lgan 11 ta foydalanilgan avtomobil hamda 2 ta ekskavator xarid qilib, ularni Suriyaga yuborgan bo‘lishi mumkin.
Politsiya qolgan uch nafar O‘zbekiston fuqarosini esa asosiy gumondorga yordam berish, jumladan, foydalanilgan transport vositalarini topishda ko‘maklashishda ayblanmoqda. Ular hibsga olinmagan holda so‘roq qilingan.
Tergov ma’lumotlariga ko‘ra, asosiy gumondor O‘zbekiston fuqarolaridan birining nomi ostida foydalanilgan avtomobillar eksporti bilan shug‘ullanuvchi kompaniyani boshqargan.
BMT 2022-yilda Al-Qoida bilan aloqador KTJni terrorchilik tashkiloti sifatida belgilagan.
Hozirda Janubiy Koreya huquqni muhofaza qiluvchi organlari tomonidan tergov harakatlari davom ettirilmoqda.
